ek jumbish si sitaaron mein hui — Tilok Chand Kausar

gul kiyaa jis ne vo thaa aur magar
shama ne shikva havaaon se kiyaa

vo ta'alluq bhi thaa kitnaa maasum
ham ne paidaa jo khataaon se kiyaa

zamin jab bhi hui karbalaa hamaare liye
to aasmaan se utraa khudaa hamaare liye

apni apni gardish-e-raftaar puuri kar to lein
do sitaare phir kisi din ek jaa ho jaaeinge

fazaa mahdud kab hai ai dil-e-vahshi falak kaisaa
nilaahaT hai nazar ki dekhte hain jo nigaahon se

zamin paanv ke niche se sarki jaati hai
hamein na chheDiye ham hain falak sataae hue

bistar-e-khaak pe baiThaa huun na masti hai na hosh
zarre sab saakit-o-saamit hain sitaare khaamosh

main aur kitne sitaaron ko Dubtaa dekhun
siyaah raat ki kashti se ab utaar mujhe