Shayari Of Asad Ali Khan Qalaq

yaar kī fart-e-nazākat kā huuñ maiñ shukr-guzār
dhyān bhī us kā mire dil se nikalne na diyā

kotāh umr ho ga.ī aur ye na kam huī
ai jaan aa ke tūl-e-shab-e-intizār dekh

umr to apnī huī sab but-parastī meñ basar
naam ko duniyā meñ haiñ ab sāhib-e-islām ham

ai parī-zād jo tū raqs kare mastī meñ
dāna-e-tāk har ik paañv meñ ghuñghrū ho jaa.e

chalā hai chhoḌ ke tanhā kidhar tasavvur-e-yār
shab-e-firāq meñ thā tujh se mashġhala dil kā

banā kar til ruḳh-e-raushan par do shoḳhī se se kahte haiñ
ye kājal ham ne yaarā hai charāġh-e-māh-e-tābāñ par

'qalaq' ġhazleñ paḌheñge jā-e-qur.āñ sab pas-e-murdan
hamārī qabr par jab majma-e-ahl-e-suḳhan hogā

yaad dilvā.iye un ko jo kabhī va.ada-e-vasl
to vo kis naaz se farmāte haiñ ham bhuul ga.e

yuuñ ruuh thī adam meñ mirī bahr-e-tan udaas
ġhurbat meñ jis tarah ho ġharīb-ul-vatan udaas

bahār aate hī zaḳhm-e-dil hare sab ho ga.e mere
udhar chaTkā koī ġhuncha idhar TuuTā har ik Tāñkā

rāh-e-haq meñ khel jāñ-bāzī hai o zāhir-parast
kyā tamāshā daar par mansūr ne naT kā kiyā

un vā.izoñ kī zid se ham ab kī bahār meñ
toḌeñge tauba pīr-e-muġhāñ kī dukān par