hamin ne hashr uThaa rakkhaa hai bichhaDne par — Vipul Kumar

har mulaaqaat pe siine se lagaane vaale
kitne pyaare hain mujhe chhoD ke jaane vaale

ik lamha-e-firaaq pe vaaraa gayaa mujhe
kaisi hasin shaam mein maaraa gayaa mujhe

ik roz khel khel mein ham us ke ho gae
aur phir tamaam umr kisi ke nahin hue

us hijr pe tohmat ki jise vasl ki zid ho
us dard pe laanat ki jo ashaar mein aa jaae

itnaa hairaan na ho meri anaa par pyaare
ishq mein bhi kai khuddaar nikal aate hain

vo ek haath baDhaaegaa tujh ko paa legaa
so dekh sabr kaa elaan bhi ziyaada nahin

mere khvaabon ke jharokon ko sajaate rahiye
na sahi vasl magar yaad to aate rahiye

kuchh yaadgaar-e-shahr-e-sitamgar hi le chalein
aae hain is gali mein to patthar hi le chalein

ai shab-e-hijraan ziyaada paanv phailaati hai kyuun
bhar gayaa jitnaa hamaari umr kaa paimaana thaa

buton ke saath li di si jo yaad-allaah baaqi hai
to kyaa shaikh-e-haram tere liye main chhoD duun vo bhi

sach hai 'nizaam' yaad bhi us ko na honge ham
par kyaa karein vo ham se bhulaayaa na jaaegaa

lete hain samar shaakh-e-samarvar ko jhukaa kar
jhukte hain sakhi vaqt-e-karam aur ziyaada