talaash ek bahaana thaa khaak uDaane kaa — Zeb Ghauri

main payambar tiraa nahin lekin
mujh se bhi baat kar khudaa mere

jaag ke mere saath samundar raatein kartaa hai
jab sab log chale jaaein to baatein kartaa hai

dil ko sambhaale hanstaa boltaa rahtaa huun lekin
sach puchho to 'zeb' tabiat Thiik nahin hoti

jagmagaataa huaa khanjar mire siine mein utaar
raushni le ke kabhi khaana-e-viraan mein aa

tere saamne aate hue ghabraataa huun
lab pe tiraa iqraar hai dil mein chor bahut

uDaa ke khaak bahut main ne dekh li ai 'zeb'
vahaan talak to koi raasta nahin jaataa

jab ki pahlu se yaar uThtaa hai
dard be-ikhtiyaar uThtaa hai

khoyaa gham-e-rifaaqat dekho kamaal apnaa
bahkaa diyaa hai sab ko dikhlaa ke haal apnaa

gulshan-e-khuld mein har-chand ki dil bahlaayaa
kucha-e-yaar magar dil se bhulaayaa na gayaa

saamne mohabbat ke hech hai siyaasat bhi
jab dimaagh thak jaae dil se kaam le ai dost

dil mein zauq-e-vasl o yaad-e-yaar tak baaqi nahin
aag is ghar mein lagi aisi ki jo thaa jal gayaa

jo chhupaa letaa hai divaar ki uryaani ko
dosto aisaa calendar nahin pheinkaa jaataa