jaag ke mere saath samundar raatein kartaa hai — Zeb Ghauri

main payambar tiraa nahin lekin
mujh se bhi baat kar khudaa mere

talaash ek bahaana thaa khaak uDaane kaa
pata chalaa ki hamein justuju-e-yaar na thi

dil ko sambhaale hanstaa boltaa rahtaa huun lekin
sach puchho to 'zeb' tabiat Thiik nahin hoti

jagmagaataa huaa khanjar mire siine mein utaar
raushni le ke kabhi khaana-e-viraan mein aa

tere saamne aate hue ghabraataa huun
lab pe tiraa iqraar hai dil mein chor bahut

uDaa ke khaak bahut main ne dekh li ai 'zeb'
vahaan talak to koi raasta nahin jaataa

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

din lage hain ye raat ko meri
chashm-e-aahu charaagh-e-sahraa hai

aa hi jaate ho khvaab mein har shab
tum miraa kitnaa dhyaan rakhte ho

muskuraate hain gaaliyaan sun kar
ye siyaasat ki be-hayaai hai