Shayari Of Ammar Iqbal

ek darvesh ko tirī ḳhātir
saarī bastī se ishq ho gayā hai

ek hī baat mujh meñ achchhī hai
aur maiñ bas vahī nahīñ kartā

maiñ ne chāhā thā zaḳhm bhar jaa.eñ
zaḳhm hī zaḳhm bhar ga.e mujh meñ

kaise kaise banā diye chehre
apnī be-chehragī banāte hue

ḳhud hī jaane lage the aur ḳhud hī
rāsta rok kar khaḌe hue haiñ

maiñ ā.īnoñ ko dekhe jā rahā thā
ab in se baat bhī karne lagā huuñ

ye jo maiñ huuñ zarā sā baaqī huuñ
vo jo tum the vo mar ga.e mujh meñ

kaisā mujh ko banā diyā 'ammār'
kaun sā rang bhar ga.e mujh meñ

maiñ ne tasvīr pheñk dī hai magar
kiil dīvār meñ gaḌī huī hai

"thak ga.e ho to thakan chhoḌ ke jā sakte ho tum mujhe vāqi'atan chhoḌ ke jā sakte ho ham daraḳhtoñ ko kahāñ aatā hai hijrat karnā tum parinde ho vatan chhoḌ ke jā sakte ho tum se bātoñ meñ kuchh is darja magan hotā huuñ mujh ko bātoñ meñ magan chhoḌ ke jā sakte ho jaane vaale se savālāt nahīñ hote miyāñ tum yahāñ apnā badan chhoḌ ke jā sakte ho jaanā chāho to kisī vaqt bhī ḳhud se bāhar apne andar kī ghuTan chhoḌ ke jā sakte ho"

"vo paikar-e-jamāl hai kamāl hai vo husn-e-be-misāl hai kamāl hai vo pūchhte haiñ aap kyoñ badal ga.e yahī mirā savāl hai kamāl hai mujhe harām hai sharāb kā nasha tumheñ lahū halāl hai kamāl hai ye maañd paḌ rahā hai āftāb kyoñ ye kuchh diyoñ kī chaal hai kamāl hai raqīb ko burā-bhalā maiñ kyoñ kahūñ vo sirf ham-ḳhayāl hai kamāl hai"

aur kitnī ghumāoge duniyā
ham to sar thaam kar khaḌe hue haiñ