aur kitni ghumaaoge duniyaa — Ammar Iqbal

khud hi jaane lage the aur khud hi
raasta rok kar khaDe hue hain

main aainon ko dekhe jaa rahaa thaa
ab in se baat bhi karne lagaa huun

us ne naasur kar liyaa hogaa
zakhm ko shaaeri banaate hue

haath jis ko lagaa nahin saktaa
us ko aavaaz to lagaane do

ek darvesh ko tiri khaatir
saari basti se ishq ho gayaa hai

kaisaa mujh ko banaa diyaa 'ammaar'
kaun saa rang bhar gae mujh mein

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi