Asrarul Haq Majaz

tire mathe pe ye anchal bahut hi khuub hai lekin
tu is anchal se ik parcham bana leti to achchha tha

ishq ka zauq-e-nazara muft men badnam hai
husn khud be-tab hai jalva dikhane ke liye

dafn kar sakta huun siine men tumhare raaz ko
aur tum chaho to afsana bana sakta huun main

ye mere ishq ki majburiyan ma.az-allah
tumhara raaz tumhin se chhupa raha huun main

bahut mushkil hai duniya ka sanvarna
tiri zulfon ka pech-o-kham nahin hai

chhup ga.e vo saz-e-hasti chheD kar
ab to bas avaz hi avaz hai

tum ne to hukm-e-tark-e-tamannaa sunaa diyaa
kis dil se aah tark-e-tamannaa kare koi

taskin-e-dil-e-mahzun na hui vo sai-e-karam farmaa bhi gae
is sai-e-karam ko kyaa kahiye bahlaa bhi gae taDpaa bhi gae

Dubo di thi jahaan tufaan ne kashti
vahaan sab the khudaa kyaa naa-khudaa kyaa

yaa to kisi ko jurat-e-didaar hi na ho
yaa phir miri nigaah se dekhaa kare koi

ham arz-e-vafaa bhi kar na sake kuchh kah na sake kuchh sun na sake
yaan ham ne zabaan hi kholi thi vaan aankh jhuki sharmaa bhi gae

tumhin to ho jise kahti hai naakhudaa duniyaa
bachaa sako to bachaa lo ki Dubtaa huun main