Dubo di thi jahaan tufaan ne kashti — Asrarul Haq Majaz

tum ne to hukm-e-tark-e-tamannaa sunaa diyaa
kis dil se aah tark-e-tamannaa kare koi

taskin-e-dil-e-mahzun na hui vo sai-e-karam farmaa bhi gae
is sai-e-karam ko kyaa kahiye bahlaa bhi gae taDpaa bhi gae

yaa to kisi ko jurat-e-didaar hi na ho
yaa phir miri nigaah se dekhaa kare koi

ham arz-e-vafaa bhi kar na sake kuchh kah na sake kuchh sun na sake
yaan ham ne zabaan hi kholi thi vaan aankh jhuki sharmaa bhi gae

tire maathe pe ye aanchal bahut hi khuub hai lekin
tu is aanchal se ik parcham banaa leti to achchhaa thaa

tumhin to ho jise kahti hai naakhudaa duniyaa
bachaa sako to bachaa lo ki Dubtaa huun main

dekh saktaa huun binaa chashme ke main
dost teri bevafaai saaf saaf

umiid un se vafaa ki to khair kyaa kiije
jafaa bhi karte nahin vo kabhi jafaa ki tarah

hai agar kuchh vafaa to kyaa kahne
kuchh nahin hai to dil-lagi hi sahi

tumhein baa-vafaa jaanne ke alaava
mujhe kuchh ghalat-fahmiyaan aur bhi hain

dushmanon ki jafaa kaa khauf nahin
doston ki vafaa se Darte hain

main ek baab thaa afsaana-e-vafaa kaa magar
tumhaari bazm se uTThaa to ik kitaab banaa