Mohammad Rafi Sauda

jis roz kisi aur pe bedad karoge
ye yaad rahe ham ko bahut yaad karoge

kaun kisi ka gham khata hai
kahne ko gham-khvar hai duniya

main ne tum ko dil diya aur tum ne mujhe rusva kiya
main ne tum se kya kiya aur tum ne mujh se kya kiya

'sauda' khuda ke vaste kar qissa mukhtasar
apni to niind uD ga.i tere fasane men

gul phenke hai auron ki taraf balki samar bhi
ai khana-bar-andaz-e-chaman kuchh to idhar bhi

jab yaar ne uTha kar zulfon ke baal bandhe
tab main ne apne dil men lakhon khayal bandhe

firaaq-e-khuld se gandum hai sina-chaak ab tak
ilaahi ho na vatan se koi gharib judaa

kis munh se phir tu aap ko kahtaa hai ishq-baaz
ai ru-siyaah tujh se to ye bhi na ho sakaa

'saudaa' se shakhs ke taiin aazurda kijiye
ai khud-parast haif nahin tu vafaa-parast

ishq se to nahin huun main vaaqif
dil ko shoala saa kuchh lipaTtaa hai

ve suratein ilaahi kis mulk bastiyaan hain
ab dekhne ko jin ke aankhein tarastiyaan hain

ammaame ko utaar ke paDhiyo namaaz shaikh
sajde se varna sar ko uThaayaa na jaaegaa