karvaTon se bus ki bus mein aur halchal ho gai — Saghar Khayyami

chehre to jhurriyon se bhare dil javaan hain
din mein hain shaikh raat mein salmaan-khaan hain

ab aap hi bataaein vo kaise nibhaaegaa
jis ko nasib dum nahin vo kyaa hilaae gaa

ek qaidi subh ko phaansi lagaa kar mar gayaa
raat bhar ghazlein sunaain us ko thaanedaar ne

mahngaai ke zamaane mein bachchon ki rel-pel
aisaa na ho kamar tiri mahngaai toD de

hamaare laal ko darkaar hai vahi laDki
ki jis kaa baap police mein ho kam se kam deputy

kitne chehre lage hain chehron par
kyaa haqiqat hai aur siyaasat kyaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

tujh se kuchh aur ta'alluq bhi zaruri hai miraa
ye mohabbat to kisi vaqt bhi mar sakti hai

main ye chaahtaa huun ki umr-bhar rahe tishnagi mire ishq mein
koi justuju rahe darmiyaan tire saath bhi tire baa'd bhi

suraagh-e-mehr-o-mohabbat kaa DhunDiyo na kahin
ki un ki raakh havaa mein bikher aayaa main

pyaar se sarshaar karnaa pyaar se chhunaa mujhe
chaak-dil insaan Thahraa TuuTe pyaale ki tarah