dil-e-muztar ko samjhaayaa bahut hai — Anwar Shadani

"paas baiThe raho kuchh der bahal jaane do dil-e-divaana machaltaa hai machal jaane do Daal do tum miri aankhon mein sharaabi aankhein meri hasrat mire armaan nikal jaane do tum to apne rukh-e-raushan se haTaa do aanchal chaandni raat jo Dhalti hai to Dhal jaane do raaz khul jaaegaa gulshan ke nigahbaanon kaa ai bahaaro hamein gulshan se nikal jaane do gham ye hai un ki nigaahein na badal jaaein kahin gar badaltaa hai zamaana to badal jaane do dusre daur ke aaghaaz se pahle yaaro laDkhaDaate hue rindon ko sambhal jaane do husn vaalo dil-e-'anvar' se kinaara na karo husn ki shama pe parvaane ko jal jaane do"

"zindagi be-sar-o-saamaan hai qissa kyaa hai jis ko dekho vo pareshaan hai qissa kyaa hai zulf aariz pe pareshaan hai qissa kyaa hai saaya-e-kufr mein imaan hai qissa kyaa hai aaj ke daur mein bas chaak-garebaan honaa tere divaanon ki pahchaan hai qissa kyaa hai yaa tire husn ki tanvir se raushan hai jahaan yaa mire ishq kaa irfaan hai qissa kyaa hai zohd shibli-o-ghazaali kaa hayaa haafiz ki haath mein 'mir' kaa divaan hai qissa kyaa hai azmat-baad-e-bahaari mujhe taslim magar phuul sharminda-e-ehsaan hai qissa kyaa hai apne anjaam se kyon aaj kaa insaan 'anvar' jaante bujhte anjaan hai qissa kyaa hai"

"paDe jo kaam to dil se kisi kaa saath na de vo aadmi nahin jo aadmi kaa saath na de charaagh vo hai andheron ko jo kare raushan vo kyaa charaagh hai jo raushni kaa saath na de chaman mein ab to ye haalat hai ham-nashinon ki ki jaise koi qafas mein kisi kaa saath na de andheraa chhaa nahin saktaa kabhi ujaale par tumhaari zulf agar tirgi kaa saath na de khudaa kare o mire dil ko toDne vaale tiraa shabaab tiri naazuki kaa saath na de gham-e-zamaana se Takraa sake ye naa-mumkin agar sharaab miri zindagi kaa saath na de agar kahin unhein be-parda dekh le 'anvar' yaqin hai chaand kabhi chaandni kaa saath na de"

"jaante hi nahin khushi kyaa hai gham ke maaron ki zindagi kyaa hai faisla kar diyaa zamaane ne dosti kyaa hai dushmani kyaa hai maa-sivaa ik hasin ghaflat ke baagh mein phuul ki hansi kyaa hai ek ke gham ko dusraa samjhe aur manshaa-e-dosti kyaa hai jaante hain tumhaare divaane azmat-e-chaak-daamani kyaa hai zulf-o-rukhsaar saaghar-o-minaa jaane ye sher-o-shaaeri kyaa hai inkisaar-o-khulus-o-hamdardi aur mearaaj-e-zindagi kyaa hai chaudhvin shab ke chaand mein 'anvar' aks un kaa hai chaandni kyaa hai"

"koi khush hai koi naakaam hai aisaa kyon hai hai kahin subh kahin shaam hai aisaa kyon hai jin ki aankhon mein khaTaktaa thaa main kaanTe ki tarah un ke honTon pe miraa naam hai aisaa kyon hai chaahe jis ki ho khataa koi bhi mujrim ho magar tire divaanon pe ilzaam hai aisaa kyon hai husn ki anjuman-aaraaiyaan taslim magar ishq aavaara-o-badnaam hai aisaa kyon hai aaj har shakhs ko har moD pe har mahfil mein shikva-e-gardish-e-ayyaam hai aisaa kyon hai main bhi mamnun huun saaqi kaa magar mere liye koi saaghar na koi jaam hai aisaa kyon hai jab hai be-parda koi saahab-e-jalva 'anvar' raushni sirf lab-e-baam hai aisaa kyon hai"

"martabe husn ke kam hon ye zaruri to nahin aap ki bazm mein ham hon ye zaruri to nahin vo to maqsum hi kuchh aur huaa karte hain sab ki taqdir mein gham hon ye zaruri to nahin yuun bhi divaane sar-e-raah bhaTak sakte hain aap ki zulf mein kham hon ye zaruri to nahin aashnaa muflis-o-naadaar ki majburi se zehn-e-arbaab-e-karam hon ye zaruri to nahin vo to kuchh raaste makhsus huaa karte hain har jagah naqsh-e-qadam hon ye zaruri to nahin chashm-e-saaqi kare rah rah ke ishaare 'anvar' aur phir hosh mein ham hon ye zaruri to nahin"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"kal shab dil-e-aavaara ko siine se nikaalaa ye aakhiri kaafir bhi madine se nikaalaa ye fauj nikalti thi kahaan khaana-e-dil se yaadon ko nihaayat hi qarine se nikaalaa main khuun bahaa kar bhi huaa baagh mein rusvaa us gul ne magar kaam pasine se nikaalaa Thahre hain zar-o-sim ke haqdaar tamaashaai aur maar-e-siyah ham ne dafine se nikaalaa ye soch ke saahil pe safar khatm na ho jaae baahar na kabhi paanv safine se nikaalaa"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"