khvaab uThaa kar taaq pe rakkhe main ne bhi — Farhat Zahid

"thakan se chuur hain aur gard se aTe hain ham nazar uThaa ki tiri samt dekhte hain ham vahi charaagh vahi main vahi fusun teraa har ek baar yunhi tujh ko chaahte hain ham tire khayaal ki khushbu udaas karti hai tire saraab ki vaadi mein gunjte hain ham ye aur baat tire saath din guzartaa hai ye aur baat tiri niind mein rahe hain ham kabhi kabhi to yuun raste mein shaam hoti hai ki hauslon ki tarah khud mein TuTte hain ham"

"ye kaise moD pe ik mehrbaan chhoD gayaa havaa ke rukh pe khule baadbaan chhoD gayaa navaadiraat ki qimat lagaane niklaa thaa jo aabdaar badan par nishaan chhoD gayaa tamaam log jise qaatilon ki saf mein rakhein vo mere sahn mein apni kamaan chhoD gayaa dar-e-duaa se tamannaaon ke dariche tak vo mere vaaste ik imtihaan chhoD gayaa pahan liyaa hai ab us ne bhi shahr kaa lahja ye kyaa huaa ki vo apni zabaan chhoD gayaa"

"khulti hui muTThi mein aansu hai ki taaraa hai ik khvaab tumhaaraa hai ik khvaab hamaaraa hai lamhon ki kalaai mein bas yaad khanakti hai bah jaate hain sab is mein ye vaqt kaa dhaaraa hai kyaa dasht-e-rifaaqat mein ehsaas ki surat hai kaise use batlaaein kyaa haal hamaaraa hai"

"aanch to diye ki thi sardiyon ki shaamon mein varna dhuup kab utri sardiyon ki shaamon mein haath se kabutar to phir uDaa diyaa main ne rah gai hai tanhaai sardiyon ki shaamon mein hijr aur hijrat ko oDh kar bhi dekhaa hai saans tak na chalti thi sardiyon ki shaamon mein sard garm lamhon ki aag taapte the ham vo jo ik rasoi thi sardiyon ki shaamon mein aaj der tak sulgi teri yaad ki khushbu dil ki baat dil se thi sardiyon ki shaamon mein"

"khuun mein Duubi ridaaein nahin dekhi jaatin bain karti hui maaein nahin dekhi jaatin khatm hote hue aansu hon ki thamtaa huaa dard ham se ab aur sazaaein nahin dekhi jaatin jaane vaalon kaa bhalaa kaise tumhein dein pursaa khaali haathon ki duaaein nahin dekhi jaatin marne vaalon ki sadaaein to main sun sakti huun jiine vaalon ki karaahein nahin dekhi jaatin phuul toDe hain bujhaae hain mire ghar ke charaagh dushmanaa teri khataaein nahin dekhi jaatin ab to aankhon mein dhuaan bharne lagaa hai 'farhat' aisi ranjur fazaaein nahin dekhi jaatin"

"jazbon ki har ek kali andhi nikli aur mohabbat us se bhi pagli nikli main bhi toD nahin paai jhuTi rasmein main bhi bas ik maamuli laDki nikli tum mujh se nafrat kaise kar paaoge main to apne jhuuT mein bhi sachchi nikli vo ghar jo ujlaa ujlaa saa lagtaa thaa jhaaDaa ponchhaa to kitni miTTi nikli sochaa thaa us se har baat chhupaaungi main bhi vaadon ki kitni kachchi nikli jo apne haathon se phaaD ke pheinki thi dil mein ik tasvir vahi rakkhi nikli"

"taavil-e-ahd-e-fan hi to vahshat kaa hal nahin pesh-e-nazar junun hai yaaro ghazal nahin ab is ke baad ahd ki taarik raat hai ye ikhtitaam-e-shaam hai subh-e-azal nahin ai dost ishq mansab-e-fahm-o-shuur hai ye irtiqaa hai zehn kaa koi khalal nahin ik umr ratjagon ki aziyyat mein kaaT di ab mere khvaab niind kaa radd-e-amal nahin kyaa kyaa ataa-e-neamat-e-rabb-e-karim hai lekin 'samir' dard kaa nemul-badal nahin"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"bahut shaadaab ho lekin bayaabaani nahin jaati ki baam-e-auj chhune se bhi arzaani nahin jaati kai chehron ne aavaazon ne dil aabaad rakkhaa hai magar aankhon mein raqsaan hai jo viraani nahin jaati mujhe apni numu ke vaaste tum se bichhaDnaa hai tumhaare saath rahne se tan-aasaani nahin jaati main is dil ki sabhi sachchaaiyaan taslim kartaa huun magar ik baat aisi bhi hai jo maani nahin jaati hujum-e-shor-o-ghul mein kaun thaa kis ne pukaaraa thaa yahaan to apni bhi aavaaz pahchaani nahin jaati 'samir' is ishq mein insaan kyaa itnaa badaltaa hai main khud par ghaur kartaa huun to hairaani nahin jaati"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"

"kis ajab saaat-e-naayaab mein aayaa huaa huun tujh se milne main tire khvaab mein aayaa huaa huun phir vahi main huun, vahi hijr kaa dariyaa-e-amiq koi dam aks-e-sar-e-aab mein aayaa huaa huun kaise aaine ke maanind chamaktaa huaa main ishq ke shahr-e-abad-taab mein aayaa huaa huun meri har taan hai az-roz-e-azal taa-ba-abad ek sur ke liye mizraab mein aayaa huaa huun koi parchhaain kabhi jism se karti hai kalaam? be-sabab saaya-e-mahtaab mein aayaa huaa huun har guzarte hue lamhe mein Tapaktaa huaa mein dard huun, vaqt ke aasaab mein aayaa huaa huun kaisi gahraai se niklaa huun adam ki 'irfaan' kaise paayaab se taalaab mein aayaa huaa huun"

"hijaab vaalon se vo be-hijaab ho na sakaa vo saamne thaa magar be-naqaab ho na sakaa vajud-e-khaak kaa insaan khitaab ho na sakaa ye zarra ghair-e-karam aaftaab ho na sakaa karam vo tuur pe ik be-niyaaz-e-jalva par vo be-niyaazi thi jis kaa javaab ho na sakaa uThaa ke parda chhupaa kasrat-e-tajalli mein vo be-naqaab huaa be-naqaab ho na sakaa tamaam umr rahe dekhte hayaat ke khvaab hamaari aankhon mein ye khvaab khvaab ho na sakaa rahi fareb-e-tasavvur ye raftani duniyaa saraab jaise kabhi ju-e-aab ho na sakaa zamir zaahir-o-baatin se ho gayaa aagaah kharaab baada-e-irfaan kharaab ho na sakaa mire karim ne bakhshaa isi bahaane se mire gunaahon kaa jab kuchh hisaab ho na sakaa abhi kami hai tire zauq-e-ishq mein 'aiman' lahu huaa tiraa aansu sharaab ho na sakaa"