Ghazal

"khol rahe hain muund rahe hain yaadon ke darvaaze log ik lamhe mein kho baiThe hain sadiyon ke andaaze log niind uchaT jaane se sab par jhunjhlaahaT si taari hai aankhein miche baandh rahe hain khvaabon ke shiraaze log shahron shahron phirte hain divaanon kaa bahrup bhare khud se chhup kar khud ko DhunD rahe hain baaze baaze log chalti phirti laashon ke honTon ki hansi par hairat kiyaa murdon par rakkhaa karte hain phuul hamesha taaze log"

"haTaa ke mez se ik roz aaina main ne phir apne-aap se rakkhaa na vaasta main ne jab apne-aap se pahchaan apni kho ke mili to khud hi kaaT diyaa apnaa raasta main ne main kam-sini mein bhi guDiyaa kabhi nahin kheli palon mein tai kiyaa barson kaa faasla main ne charaagh huun mujhe jab dhuup raas aa na saki to khud sikoD liyaa apnaa daaera main ne main apne aap mein huun yaa nahin, kabhi apnaa kisi ko Thiik bataayaa nahin pata main ne ajiib kyaa jo bikheraa nahin sameT ke phir tamaam umr umidon kaa silsila main ne"

"na yaad aayaa na bhulaa vo saaneha mujh ko banaa gayaa jo ik aisaa mujassama mujh ko ki raaste mein khaDaa but samajh ke chhoD gayaa tamaam umr ki yaadon kaa qaafila mujh ko main so rahi thi usi daastaan mein sadiyon se sulaa gayaa thaa jahaan meraa haafiza mujh ko kisi qadim kahaani kaa ik charaagh huun main bujhaa ke chhoD gai taaq par havaa mujh ko phir uTh ke niind mein jaati thi us taraf har shab pukaartaa thaa jidhar se miraa pataa mujh ko magar ye hosh na thaa le ke jaa rahaa hai kahaan bikharti TuTti yaadon kaa silsila mujh ko"

"na jaane kab se baraabar miri talaash mein hai ye kaun khud mire andar miri talaash mein hai vo mujh mein aur kisi ko talaash kartaa hai jo mere paas bhi rah kar miri talaash mein hai gilaa thaa jis ko ki main us kaa aaina na bani ab apne saae se thak kar miri talaash mein hai ubal paDun na main ik din kahin kinaaron se zamin huun main samundar miri talaash mein hai"

"mere andar ek dastak si kahin hoti rahi zindagi oDhe hue main be-khabar soti rahi koi mausam meri ummidon ko raas aayaa nahin fasl andhiyaaron ki kaaTi aur diye boti rahi kahne vaalaa khud to sar takiye pe rakh kar so gayaa meri be-chaari kahaani raat bhar roti rahi raaste mein is qadar yaadon ke doraahe paDe aaj maazi ki saDak har moD par khoti rahi"

"tu aayaa to dvaar bhiDe the diip bujhaa thaa aangan kaa sudh bisraane vaale mujh ko hosh kahaan thaa tan man kaa jaane kin zulfon ki ghaTaaein chhaai hain meri nazron mein rote rote bhiig chalaa is saal bhi aanchal saavan kaa thoDi der mein thak jaaeinge nil-kamal si rain ke paanv thoDi der mein tham jaaegaa raag nadi ke jhaanjhan kaa phir bhi meri baanhon ki khushbu har Daal pe lachkegi har taaraa hiiraa saa lagegaa mujh ko mere kangan kaa tum aao to ghar ke saare diip jalaa duun lekin aaj meraa jaltaa dil hi akelaa diip hai mere aangan kaa"

"TaToltaa huaa kuchh jism o jaan tak pahunchaa vo aadmi jo miri daastaan tak pahunchaa kisi janam mein jo meraa nishaan milaa thaa use pataa nahin ki vo kab us nishaan tak pahunchaa main sirf ek khalaa thii, jahaan fazaa na havaa jab aarzu kaa parinda uDaan tak pahunchaa na jaane raah mein kyaa us pe haadsa guzraa ki umr bhar na nazar se zabaan tak pahunchaa ye kam-nasib bhaTaktaa huaa andheron mein kabhi yaqin kabhi phir gumaan tak pahunchaa vo jis mein hadd-e-nazar tak charaagh jalte the vo raasta hi faqat darmiyaan tak pahunchaa"

"mire mizaaj ko suraj se joDtaa kyuun hai main dhuup huun mujhe naahaq sikoDtaa kyuun hai agar ye sach hai ki tu meraa khvaab hai to bataa ki aankh lagte hi mujh ko jhinjhoDtaa kyuun hai udhar bhi tu hai idhar bhi jo sirf tu hi hai to phir ye biich ki divaar toDtaa kyuun hai main tere vaade ko jab aansuon se dhoti huun har ek lafz tiraa rang chhoDtaa kyuun hai magar ye dil hai ki kyaa jaane teri baaton se tarah tarah ke bahaane nichoDtaa kyuun hai"

"main us ki baat ke lahje kaa e'tibaar karun karun ki us kaa na main aaj intizaar karun main sirf saaya huun apnaa magar ye zid hai mujhe ki apne-aap ko khud se alag shumaar karun ajab mizaaj hai us kaa bhi chaahtaa hai ki main ba-taur-e-vaza faqat khud ko ikhtiyaar karun main ik athaah samundar huun is khayaal mein gharq ki Duub jaaun main khud mein ki khud ko paar karun khud apne-aap se milne ke vaaste pahle main apne-aap ko dariyaa se aabshaar karun main us ki dhuup huun jo meraa aaftaab nahin ye baat khud pe main kis tarah aashkaar karun kisi qadim kahaani mein ek muddat se vo so rahaa hai ki main us ko hoshiyaar karun phir ek aas ki chilman se umr bhar lag ke khud apne paanv ki aahaT kaa intizaar karun"

"alaava ik chubhan ke kyaa hai khud se raabta meraa bikhar jaataa hai mujh mein TuuT ke har aaina meraa ulajh ke mujh mein apne-aap ko suljhaa rahaa hai jo na jaane khatm kar baiThe kahaan par silsila meraa mujhe chakhte hi kho baiThaa vo jannat apne khvaabon ki bahut miltaa huaa thaa zindagi se zaaiqa meraa main kal aur aaj mein haael koi naadida vaqfa huun mire khvaabon se naapaa jaa rahaa hai faasla meraa vo kaisaa shahr thaa maanus bhi thaa ajnabi bhi thaa ki jis ki ik gali mein kho gayaa mujh se pataa meraa palaT aataa hai har din ghar ki jaanib shaam Dhalte hi kisi be-naam basti se guzar ke raastaa meraa ye main huun yaa miraa saaya miraa saaya hai yaa main huun ajab si dhund mein lipTaa huaa hai haafiza meraa hansi aai thi apni bebasi par ek din mujh ko abhi tak gunjtaa hai mere andar qahqaha meraa"

"ruuTh jaaegaa to mujh se aur kyaa le jaaegaa bas yahi hogaa ki jiine kaa mazaa le jaaegaa sardiyon ki dopahar se dhuup le jaaegaa vo garmiyon ki shaam se ThanDi havaa le jaaegaa sabz mausam ki tanaabein khinch legaa jism se aur baalon se mire kaali ghaTaa le jaaegaa apne andar zard patton ki tarah bikhrun gi mein mere andar se mujhe patjhaD uDaa le jaaegaa"

"phunk deinge mire andar ke ujaale mujh ko kaash dushman miraa qindil banaa le mujh ko ek saaya huun main haalaat ki divaar mein qaid koi suraj ki kiran aa ke nikaale mujh ko apni hasti kaa kuchh ehsaas to ho jaae mujhe aur nahin kuchh to koi maar hi Daale mujh ko main samundar huun kahin Duub na jaaun khud mein ab koi mauj kinaare pe uchhaale mujh ko tishnagi meri musallam hai magar jaane kyuun log de dete hain TuuTe hue pyaale mujh ko"

"mujhe kahaan mire andar se vo nikaalegaa paraai aag mein koi na haath Daalegaa vo aadmi bhi kisi roz apni khalvat mein mujhe na paa ke koi aaina nikaalegaa vo sabz Daal kaa panchhi main ek khushk darakht zaraa si der mein vo apnaa raasta legaa main vo charaagh huun jis ki ziyaa na phailegi mire mizaaj kaa suraj mujhe chhupaa legaa kuredtaa hai bahut raakh mere maazi ki main chuuk jaaun to vo ungliyaan jalaa legaa vo ik thakaa huaa raahi main ek band saraae pahunch bhi jaaegaa mujh tak to mujh se kyaa legaa"

"zaraa mushkil se samjheinge hamaare tarjumaan ham ko abhi dohraa rahi hai khud hamaari daastaan ham ko kisi ko kyaa khabar patthar ke pairon par khaDe hain ham sadaaon par sadaaein de rahe hain kaarvaan ham ko ham aise surmaa hain laD ke jab haalaat se palTe to baDh ke zindagi ne pesh kiin baisaakhiyaan ham ko sambhaalaa hosh jab ham ne to kuchh mukhlis azizon ne kai chehre diye aur ek patthar ki zabaan ham ko uThaa hai shor khud apne hi andar se magar aksar dahal ke band kar lenaa paDi hain khiDkiyaan ham ko ham apne jism mein bikhre hue hain ret ki surat sameTeingi kahaan tak zindagi ki muTThiyaan ham ko bichhaD ke bhiiD mein khud se havaason kaa vo aalam thaa ki munh khole hue takti rahin parchhaaiyaan ham ko"

"thakan se chuur huun lekin ravaan-davaan huun main nai sahar ke charaaghon kaa kaarvaan huun main havaaein mere varaq lauT lauT deti hain na jaane kitne zamaanon ki daastaan huun main har ek shahr-e-nigaaraan samajh rahaa hai mujhe zaraa qarib se dekho dhuaan dhuaan huun main kisi se bhiiD mein chehra badal gayaa hai miraa to saare aaina-khaanon se bad-gumaan huun main main apni guunj mein khoi huun ek muddat se mujhe khabar nahin kuchh kaun huun kahaan huun main khud apni diid se mahrum hai nazar meri azal se surat-e-nazzaara darmiyaan huun main miraa vajud-o-adam raaz hai hamesha se vahaan vahaan bhi nahin huun jahaan jahaan huun main"

"zindagi ke saare mausam aa ke rukhsat ho gae meri aankhon mein kahin barsaat baaqi rah gai aas kaa suraj to saari zindagi niklaa magar din ke andar jaane kaise raat baaqi rah gai aaina-khaana banaa ke jis ne toDaa thaa mujhe meri kirchon mein usi ki zaat baaqi rah gai meraa ik ik lafz mujh se chhin kar vo le gayaa jis ke kaaran aaj tak vo baat baaqi rah gai"

"lahu se uTh ke ghaTaaon ke dil baraste hain badan chhaton ki tarah dhuup mein jhulaste hain ham aise peD hain jo chhaanv baandh kar rakh dein shadid dhuup mein khud saae ko taraste hain har ek jism ke chaaron taraf samundar hai yahaan ajiib jaziron mein log baste hain sabhi ko dhun hai ki shishe ke baam-o-dar hon magar ye dekhte nahin patthar abhi baraste hain bahaa ke le gayaa sailaab raaste jin ke vo shahr apne khayaalon mein ab bhi baste hain maaal kyaa hai ujaalon ke un dafinon kaa jinhein chhuein to andheron ke naag Daste hain ajiib log hain kaaghaz ki kashtiyaan gaDh ke samundaron ki balaa-kheziyon pe hanste hain"

"meraa bhi har ang thaa bahraa us kaa jism bhi gungaa thaa varna aapas mein kahne-sunne ko jaane kyaa kyaa thaa mere andar se jo mujh mein diip jalaane niklaa thaa jaane kitni baar vo apne hi saae se uljhaa thaa is ghar ke chappe chappe par chhaap hai rahne vaale ki mere jism mein mujh se pahle shaayad koi rahtaa thaa koi pyaasaa mil jaae to phir lahrein le saktaa huun ab main gham se suukh gayaa huun pahle main bhi dariyaa thaa"

"kis qadar kam-asaas hain kuchh log sirf apnaa qayaas hain kuchh log jin ko divaar-o-dar bhi Dhak na sake is qadar be-libaas hain kuchh log mutmain hain bahut hi duniyaa se phir bhi kitne udaas hain kuchh log vo bure hon bhale hon jaise hon kuchh hon logon ko raas hain kuchh log mausamon kaa koi asar hi nahin in pe jangal ki ghaas hain kuchh log tirgi mein nazar nahin aate saae ki tarah paas hain kuchh log"

"ek diye ne sadiyon kyaa kyaa dekhaa hai batlaae kaun chhoDo agle vaqton ke qisse phir se dohraae kaun ab bhi khaDi hai soch mein Duubi ujyaalon kaa daan liye aaj bhi rekhaa paar hai raavan siitaa ko samjhaae kaun apnaa apnaa aasan chhoD ke har murat uTh aai hai sone ki divaaron mein rah kar paathar kahlaae kaun jis ne diye ki kaalak ko bhi maathe kaa sindur kiyaa apne ghar ki us divaar se apnaa bhed chhupaae kaun jaane kitne raaz khulein jis din chehron ki raakh dhule lekin saadhu-santon ko dukh de kar paap kamaae kaun ek nayaa sapnaa bantaa hai aur ban kar is soch mein hai sadiyon se aapas mein uljhe dhaagon ko suljhaae kaun ab bhi buzurgon ki baatein sun kar achchhaa to lagtaa hai par in girti divaaron se apni piiTh lagaae kaun"

"nikalnaa khud se mumkin hai na mumkin vaapsi meri mujhe ghere hue hai har taraf se be-rukhi meri bujhaa ke rakh gayaa hai kaun mujh ko taaq-e-nisyaan par mujhe andar se phunke de rahi hai raushni meri main khvaabon ke mahal ki chhat se gir ke khud-kushi kar luun haqiqat se agar mumkin nahin hai dosti meri main apne jism ke murda ajaaib-ghar ki zinat huun mujhe dimak ki surat chaaTti hai zindagi meri"

"zaraa si der mein vo jaane kyaa se kyaa kar de kise charaagh banaa de kise havaa kar de mire mizaaj ke kuufe pe jis kaa qabza hai khabar nahin ki vo kab mujh ko karbalaa kar de ye kaun shakhs hai us lafz jaisaa lagtaa hai mire vajud ke matlab ko jo adaa kar de"

"aap bhi ret kaa malbus pahan kar dekhein ham vo pyaase hain na sahraa na samundar dekhein ik zaraa Dher mein kuuDe ke bhi chhup kar dekhein log hiiraa hamein samjhe hain ki patthar dekhein ham mein jo shakhs hai us se nahin banti apni ab to rahne ke liye aur koi ghar dekhein shor be-samt sadaaon kaa kuchh aisaa hai ki ham apne andar kabhi jhaankein kabhi baahar dekhein"

"liyaa hai kis qadar sakhti se apnaa imtihaan ham ne ki ik talvaar rakh di zindagi ke darmiyaan ham ne hamein to umr bhar rahnaa thaa khvaabon ke jaziron mein kinaaron par pahunch kar phunk Daalin kashtiyaan ham ne hamaare jism hi kyaa saae tak jismon ke zakhmi hain dilon mein ghonp liin hain raushni ki barchhiyaan ham ne hamein di jaaegi phaansi hamaare apne jismon mein ujaaDi hain tamannaaon ki laakhon bastiyaan ham ne vafaa ke naam par pairaa kiye kachche ghaDe le kar Duboyaa zindagi ko daastaan-dar-daastaan ham ne"