Ghazal

"har uzv musaafir hai nahin kuchh safari aankh hai aakhir-e-shab umr charaagh-e-sahari aankh kyaa karti hai dilkash sukhan ai rashk-e-pari aankh lo siikh gai tarz-e-kalaam-e-bashri aankh un aankhon mein saanea ne bhare kuuT ke moti qismat ye hamaari hai ki ashkon se bhari aankh baatein jo karo naaz se tum munh ko chhupaa kar sunne ke liye kaan ho ai rashk-e-pari aankh aayaa hai mire dil kaa ghubaar aansuon ke saath lo ab to hui maalik-e-khushki-o-tari aankh ab tak vahi ronaa hai vahi hasrat-e-didaar ham mar gae is par bhi ye kaafir na mari aankh tayyaar kiyaa khaama-e-mu apne mizha se khincheinge magar naqsha-e-naazuk kamri aankh nargis pe nazar kiije dobaara ki vo kaT jaae ho jaae nazar-e-saani mein is ki nazari aankh sohbat kaa asar saahab-e-binish ko ho kyunkar ainak ho agar sabz na ho jaae hari aankh baaton ko zabaan misl-e-sukhan munh se nikal jaae nazzaare ko ho paa-e-nigah se safari aankh tir-e-mizha-e-yaar ko mizhgaan hi samajhte kis aankh se laDte hi sadaa balbe jari aankh raftaar to dikhlaa ke za-khud rafta banaa do nargis ki tarah hai hama-tan kabk-e-dari aankh daaman ki tarah chaak hue aankh ke parde o dast-e-junun se ki gai jaama-dari aankh jo ahl-e-nazar mein kabhi khud-bin nahin hoti dekho ki hai is aib-e-numaayaan se bari aankh kyaa qahr sivaa aayat-e-abru hui naazil Dar hai na kare daava-e-paighaambari aankh kashti vo liye nuuh ki maanind chale aaein tufaan bapaa kar shab-e-furqat mein ari aankh rahte hain 'vazir' ashk ki jaa TukDe jigar ke in rozon hui kaan-e-aqiq-e-jigri aankh"

"jo khaas bande hain vo banda-e-avaam nahin hazaar baar jo yusuf bike ghulaam nahin bhalaa ho kyaa dil-e-zaahid mein soz-e-ulfat-e-haq kabhi jalaane ke qaabil charaagh-e-khaam nahin gilaa hai chashm-e-sukhan-go se khaamushi kaa hamein dahan ke hone na hone mein kuchh kalaam nahin tu aaftaab hai zulf-e-siyah nahin to na ho charaagh-e-roz ko kuchh ehtiyaaj-e-shaam nahin 'aziz aashiq-e-gumnaam kaa hai dil us ko nagin vo haath mein rakhtaa hai jis mein naam nahin bas ek haath mein do ho ke paDh dogaanaa-e-ishq jo be-namaaz hai vo qaabil-e-salaam nahin ye sar jhukaanaa ye munh phernaa hai maane'-e-did miri namaaz mein sajda nahin salaam nahin vo mujh pe marne lagi jo hai mere darpai-e-qatl ilaahi is ke sivaa aur intiqaam nahin firaaq-e-yaar mein dast-e-subu uDaate hain khaak ye gard-baad hai gardish mein apnaa jaam nahin na hans rulaaegaa tujh ko khumaar-e-baada-e-aish mai-nashaat to is bazm mein mudaam nahin phanse na qaid-e-ta'alluq mein jo ki hai aazaad chaman mein taair-e-nikhat asir-e-daam nahin vo dil ho chaak nahin 'ishq kaa nishaan jis mein nagin vo TuuTe mohabbat kaa jis mein naam nahin rahegaa hijr kaa din kab kaTe agar shab-e-vasl mudaam roz-e-qayaamat ko bhi qayaam nahin bane jo baal kaa phandaa tumhaari tegh kaa baal to murgh-e-jaan ke liye behtar is se daam nahin mai-e-do-aatisha-e-kufr-o-din se khalq hai mast magar sharaab ye ham-mashrabo haraam nahin pukaaraa apnaa gadaa kah ke mujh ko ai shah-e-husn faqir huun tire dar kaa 'vazir' naam nahin"

"chalaa hai o dil-e-raahat-talab kyaa shaadmaan ho kar zamin-e-ku-e-jaanaan ranj degi aasmaan ho kar kiyaa viraan chaman ko aae ho kyaa bostaan ho kar hue gul paani paani ye chali aab-e-ravaan ho kar isi khaatir to qatl-e-aashiqaan se man' karte the akele phir rahe ho yusuf-e-be-kaarvaan ho kar javaab-e-naama kyaa laayaa tan-e-be-jaan mein jaan aai gayaa yaan se kabutar vaan se aayaa murgh-e-jaan ho kar ghazab hai ruuh se is jaama-e-tan kaa judaa honaa libaas-e-tang hai utregaa aakhir dhajjiyaan ho kar agar aahista bolun naa-tavaani kahti hai bas bas sadaa-e-jumbish-e-lab dete hi sadme fughaan ho kar izaar-e-aatishin khatt-e-siyah ik din nikaalegaa rulaaegaa ye sho'la meri aankhon kaa dhuaan ho kar mukaddar ho agar lo mujh ko gaaDo is taraf dekho ki zer-e-khaak huun gard-e-nigah se naa-tavaan ho kar kiyaa ghairon ko qatl us ne mue ham rashk ke maare ajal bhi dosto aai nasib-e-dushmanaan ho kar phiraa sad-chaak ho kar kucha-e-kaakul se dil apnaa azizo yusuf-e-gum-gashta aayaa kaarvaan ho kar kamaan abru ki aise narm hai aaegaa jo naavak rahegaa ustukhvaan mein apne maghz-e-ustukhvaan ho kar chhuDaai chuus kar ham ne misi to kyaa hai sharmaayaa lab us mahjub kaa chhupne lagaa munh mein zabaan ho kar falak meri tarah aakhir tujhe bhi piis Daalegaa uDegaa ai humaa ik roz gard-e-ustukhvaan ho kar humaa se hai kaDaapan ai sag-e-jaanaan jo tu khaae mulaaim ustukhvaan ho jaaein maghz-e-ustukhvaan ho kar jahaan jo chaahiye vaisi hi vo dikhlaae nairangi basar aankhon mein goyaai zabaan mein dil mein jaan ho kar sitam kar us ke ye dekhe to khun-rezi pe maail ho kare sang-e-malaamat tez khanjar ko fasaan ho kar nahaane mein jo lahraati hai zulf-e-yaar dariyaa mein taDapne lagti hain paani pe maujein machhliyaan ho kar udaasi jhuk ke milte ho nigah se qatl karte ho sitam-ijaad ho naavak lagaate ho kamaan ho kar uThaaegi jo ham ko vahshat-e-dil yaar ke dar se gireinge paaezi paanv pe apne beDiyaan ho kar kahaa jo us ne chaahaa zo'f se yaan lab nahin milte subuk kar deti hain harf-e-sukhan baar-e-garaan ho kar asar baaqi rahaa balbe shab-e-furqat ki taariki charaagh-e-roz se sho'la nikal aayaa dhuaan ho kar khat-e-nau-khez mein aariz jo tere chhupte jaate hain pari ban jaaeinge is sabz shishe mein nihaan ho kar giraa qadmon pe said-e-naa-tavaan thaa haath se chhuT kar jagah de ab to naqsh-e-paae-e-sayyaad aashiyaan ho kar tire vahshi ko barson ai pari kab niind aati hai agar khvaab-e-giraan aayaa bhi to sang-e-giraan ho kar 'vazir' us kaa huun main shaagird jis ko kahte hain munsif liyaa mulk-e-maaani baadshaah-e-shaairaan ho kar"

"nahin kaTtaa hai ye maidaan-e-balaa vaadi-e-khizr bayaabaan-e-balaa mustaid zulf miri ranj pe hai hai muhayyaa sar-o-saamaan-e-balaa mar gayaa gesu-e-pur-pech mein dil chhuT gayaa qaidi-e-zindaan-e-balaa haar phulon ki hain choTi mein ayaan kyaa hi phulaa hai gulistaan-e-balaa bole bikhraa ke vo zulfein apni ham hue silsila-jumbaan-e-balaa unchi choTi hai ghazab ai yam-e-husn kyaa hi uTThaa hai ye tufaan-e-balaa kaan ki lau tiri zulfon mein nahin hai charaagh-e-tah-e-daamaan-e-balaa garmi-e-rukh se araq-rez hai zulf hai guhar-baar ye naisaan-e-balaa dil mire siine mein hai mahv-e-mizha hai yahi sher-e-niyastaan-e-balaa"

"mere naalon se tah-o-baalaa hui aksar zamin zer-e-paa aayaa falak aur baarhaa sar par zamin hai dayaar-e-maah-ru kaa bas yahi qaasid nishaan aasmaan tujh ko nazar aaegi vaan ki sar-zamin kis taraf jaaun ki ho in do balaaon se najaat aasmaan ghar ghar yahi hai aur yahi ghar ghar zamin baari baari ye mujhe pisein ba-rang-e-aasiyaa aasmaan din bhar rahe gardish mein to shab-bhar zamin misl-e-khurshid aasmaan jaltaa hai aah-e-garm se kaanpti hai ThanDi saanson se miri thar-thar zamin jis jagah hain dafn qaatil teri mizhgaan ke shahid vaan evaz sabzi ke paidaa karti hai nashtar zamin saikDon is mein gae mahbub jaa-e-rashk hai rakhti hai aaghosh mein kyaa kyaa pari-paikar zamin aatish-e-furqat se aalam kora-e-aatish huaa aasmaan hai duud ham akhgar mein aur mujmar zamin ishq-e-khaal-e-yaar ne aisaa kiyaa zaar-o-nahif baiThe rahne ko mire kaafi hai ab til bhar zamin"

"tire rukh kaa kise saudaa nahin hai gul-e-laala talak sahraa-nashin hai phiraa hai aap vo mah-ru hamaaraa tiraa ai aasmaan shikva nahin hai kahin aisaa na ho uTThe na talvaar yahi Dar hai ki qaatil naaznin hai na puchho mere aansu tum na puchho kahegaa koi tum ko khosha-chin hai adab se paa-barahna phirte hain ham junun farsh-e-ilaahi ye zamin hai buraa sab dushmanon kaa chaahte hain main khush huun jaise dil andoh-gin hai rahe mazmun-e-gham ki tarah is mein hamaaraa ghar hai yaa bait-e-hazin hai jahaan hai jalva-gar vo ghairat-e-maah ilaahi aasmaan hai yaa zamin hai banaayaa tujh ko aisaa khubsurat ki naazaan tujh pe surat-aafrin hai hain ishq-e-zulf mein aazaa bhi dushman hamaaraa haath maar-e-aastin hai na niklaa be tire main ghar se baahar nigah tak chashm mein khalvat-nashin hai falak jo chaahe ham par zulm kar le abhi to zabt-e-aah-e-aatishin hai paDaa hai tafraqa be-taabiyon se 'vazir' ab main kahin huun dil kahin hai"

"ek aalam ne jubba-saai ki ai buto tum ne bhi khudaai ki aashiqon ke lahu ki pyaasi hain machhliyaan us kaf-e-hinaai ki zulf-e-pur-pech se jo dil uljhaa biich mein rakh paDaa safaai ki murgh-e-be-baal-o-par huun ai sayyaad aarzu hai kisi rihaai ki ai junun dasht ko chaleinge ham hai qasam is barahna-paai ki sar judaa ham ne apnaa kar Daalaa aai jab guftugu judaai ki phir gayaa yaar ghar ke paas aa kar bakht-e-bargashta ne buraai ki saikDon jaame tujh pe phaTte hain dhuum hai teri mirzaai ki tujh se to ham ko ai kham-e-abru thi na ummid kaj-adaai ki koi qaatil ki raah bhulaa thaa ai ajal tu ne rahnumaai ki dil kahin aur ham ne aTkaayaa be-vafaaon se bevafaai ki na gai zaahidon ke paas kabhi dukhtar-e-raz ne paarsaai ki shahr mein jaaegi miri paa-posh qadr vaan kyaa barahna-paai ki saaf hai aaina tan-e-pur-nur hai dalil us pe khud-numaai ki kaasa-e-maah kyuun na ho pur-nur barson us kuche ki gadaai ki kaaba-e-dil mein bhi maqaam kiyaa ai buto tum ne kyaa rasaai ki khat ke aane pe bhi mukaddar hai surat ab kaun si safaai ki baal-o-par bhi gae bahaar ke saath ab to surat nahin rihaai ki kis ke kuche ki raah bhulaa huun khizr ne bhi na rahnumaai ki shaah kahlaae har tarah se 'vazir' baadshaahi na ki gadaai ki"

"baat kaa apni na jab paayaa javaab ham ye samjhe vo dahan hai laa-javaab baatein sunvaain lab-e-khaamosh ne varna ham dete use kyaa kyaa javaab be-nishaan hai vo kamar shakl-e-dahan kaun si shai hai nahin jis kaa javaab saada kaaghaz bhejaa naame ke evaz vaan se aayaa bhi to saaf aayaa javaab puchhtaa gar us kamar kaa main nishaan ghaib se miltaa mujhe is kaa javaab tum jo kuchh kahte zabaan-e-tegh se main dahaan-e-zakhm se detaa javaab aaj mujh se baat agar karte nahin deinge ye but kal khudaa ko kyaa javaab be-dahan vo hai to main huun be-zabaan yaar ki surat huun main bhi laa-javaab kah ke ik misraa mah-e-nau rah gayaa ho sakaa kab bait-e-abru kaa javaab baat sidhi ki jo thaa mazkur-e-qad zikr-e-abru mein diyaa TeDhaa javaab kijiye kyaa baat us kaj-taba se degaa charkh-e-vazhgun ulTaa javaab baatein kartaa hai jo parda chhoD kar mujh ko detaa hai vo dar-parda javaab aa gayaa ai vaae paighaam-e-ajal par na qaasid le ke kuchh aayaa javaab sun ke baitein mere haasid chup rahe ai 'vazir' apnaa sukhan hai laa-javaab"

"sar miraa kaaT ke pachhtaaiyegaa kis ki phir jhuTi qasam khaaiyegaa thaam luun dil ko zaraa haathon se abhi pahlu se na uTh jaaiyegaa kahiye yaaraan-e-adam kyaa guzri kuchh lab-e-gor se farmaaiyegaa yusuf-e-husn agar gham hogaa aap yaaqub nazar aaiyegaa kar ke isbaat-e-dahan kijiye vasf dekhiye munh ki abhi khaaiyegaa kam bhi dene mein bahut faaeda hai bosa ik dijiye das paaiyegaa khat pe khat likhiyegaa ai shaah-savaar ghoDi kaaghaz ki bhi dauDaaiyegaa mardum-e-chashm se aae jo hijaab aankh ke parde mein chhup jaaiyegaa kyaa garebaan ne galaa ghonTaa hai idhar ai dast-e-junun aaiyegaa kah ke paanv se chale yaar ke ghar ham jo uThne lagein so jaaiyegaa kah ke ye tum ho baDe har baabe dar-ba-dar kyaa mujhe phirvaaiyegaa kyuun banaavaT se aji rote hain aap jhuTe moti kise dikhlaaiyegaa jaam saaqi se jo maangaa to kahaa bhar ke ashk aankh mein pi jaaiyegaa mushaf-e-rukh ki qasam mein hai maza ham se quraan ye uThvaaiyegaa khat ghulaami kaa nahin ai yusuf khat jo niklaa hai na sharmaaiyegaa ham ne yusuf jo kahaa kyuun bigDe mol legaa koi bik jaaiyegaa hazrat-e-kaaba jo ban jaaiye arsh dil ki vusat na kabhi paaiyegaa ham bhi aa nikleinge masjid mein 'vazir' khisht-e-khum le ke jo banvaaiyegaa"

"jiite ji bas vo but rahaa hamraah ab to bande ke hai khudaa hamraah dil diyaa us ko par ye Dartaa huun dushman ik dost ke kiyaa hamraah nahin yaaraan-e-raftagaan kaa nishaan le gae kyaa ye naqsh-e-paa hamraah is mein kyaa aap ki hai rusvaai rahe gar mujh saa paarsaa hamraah tujhe dekhaa jidhar nigaah gai thaa tasavvur zi-bas tiraa hamraah ranj-e-tanhaai-e-lahad na rahaa yaar ke gham ko le liyaa hamraah shab ko jaate ho saath lo mash'al kahiye to ho ye dil-jalaa hamraah hue baa'd apne bevafaa 'ushshaaq le gae yaan se ham-vafaa hamraah teri raftaar kaa main kushta huun qabr tak aaiyo zaraa hamraah ye dil-e-bad-gumaan na dekh sake agar us but ke ho khudaa hamraah taa salaamat tu aae ai qaasid Thahar itnaa karun du'aa hamraah us ne tanhaa mujhe na jaane diyaa gham-e-furqat ko kar diyaa hamraah naa-tavaan hai bahut ghubaar miraa tu zaraa rahiyo ai sabaa hamraah rahi yaan gardish aur jaama-dari kaash laate na dast-o-paa hamraah gaaliyaan jaise diin hain dil le kar jaaegaa ye diyaa liyaa hamraah jaa na tanhaa tu ai shah-e-khubaan ho 'vazir'-e-barahna-paa hamraah"

"tiri taraf se dil ai jaan-e-jaan uThaa na sake bahut zaiif the baar-e-garaan uThaa na sake hazaar baar bahaar aai lekin ai sayyaad nigaah ham taraf-e-bostaan uThaa na sake asir-e-zulf jo marte hain to vo kahte hain zaraa bhi sadma-e-qaid-e-giraan uThaa na sake sunin jo yaar ki baatein ghash aa gayaa ham ko ye naa-tavaan the ki lutf-e-bayaan uThaa na sake"

"tegh-e-uryaan pe tumhaari jo paDi meri aankh chashm-e-jauhar se aji khuub laDi meri aankh na haTi peT par us ke jo paDi meri aankh ban gai naaf-e-shikam aise aDi meri aankh ashk-e-gul rang piroti hai mizha mein kyaa khuub kyaa banaati hai ye phulon ki chhaDi meri aankh tum rahe baam pe yaan lag gaiin aankhein chhat se raat ginti rahi har ek kaDi meri aankh is khajaalat ne abad tak mujhe sone na diyaa hijr mein lag gai thi ek ghaDi meri aankh dur-e-dandaan ki bhalaa aaina kyaa jaane qadr is ko dikhlaao mubassir hai baDi meri aankh khat-e-rukhsaar nahin paa-e-nigah ke hain nishaan aariz-e-saaf pe sau baar paDi meri aankh yaad aae jo tire tegh kaa maalaa qaatil roke paidaa kare moti ki laDi meri aankh rakhna divaar mein meamaar banaanaa kyaa thaa tu ne rauzan ke evaz kyuun na jaDi meri aankh zindagi mein to kiyaa mardum-e-aabi mujh ko dekhun ab kyaa ho mire saath gaDi meri aankh zulf ki tarah se zanjir hui jaati hai narm paDti hai josh-e-junun mein ye kaDi meri aankh kyaa usi ne ye kiyaa matla-e-abru mauzun tum jo kahte ho sukhan-goi baDi meri aankh chashm mein surme kaa dumbaala banaa kar bole kyuun asaa Tek ke ho jaae khaDi meri aankh nakhl-e-nargis nahin turbat pe nazaare ke liye aaine dekhti hai raah khaDi meri aankh nazar aaegi zamin kashti-e-dariyaa-e-fanaa dekh lenaa jo mire saath gaDi meri aankh baaghbaan nahr nahin yaad mein ik kuche ki ro rahi hai ye gulistaan mein paDi meri aankh karte hi ek nigah mein lab-e-naazuk ko kabud kyaa banaa deti hai missi ki dhaDi meri aankh aae teraa jo tasavvur bhi to bahr-e-taazim kyaa ajab paa-e-nigah se ho khaDi meri aankh dil par-e-daagh huaa dafn to laala niklaa ugi nargis jo gulistaan mein gaDi meri aankh yaad aate hain mujhe hazrat-e-'naasikh' jo 'vazir' kyaa lagaa deti hai ashkon ki jhaDi meri aankh"

"ezaar-e-yaar pe zulf-e-siyaah-faam nahin magar ye hashr kaa din hai ki jis ki shaam nahin firaaq-e-yaar mein dono se ham ko kaam nahin havas sahar ki nahin aarzu-e-shaam nahin vilaa-e-kaaba-e-abru se munh ko kyaa pherun namaaz khatm na ho jab talak salaam nahin ye saif aap ki misl-e-pari-sahi-qad hai magar ye aib hai chalti nahin khiraam nahin kaho na sarv ko ik zar-kharid hi apnaa kiyaa jo bande ko aazaad phir ghulaam nahin nahin iaada-e-taaat ko peshvaa darkaar qazaa namaaz ko kuchh haajat-e-imaam nahin kisi tarah shab-e-furqat basar nahin hoti kuchh is ko gardish-e-ayyaam se bhi kaam nahin jo us ne baat na ki ho gayaa mujhe isbaat dahan vo tang hai gunjaaish-e-kalaam nahin bujhi hai aab se kyaa teri tegh-e-tez ki aanch ki khunfishaan mire dil kaa kabaab-e-khaam nahin phiri hai furqat-e-jaanaan mein chashm-e-dukhtar-e-raz ye gardish aankh ki saaqi hai daur-e-jaam nahin na dekhaa naqsh qadam kaa sadaa-e-paa na suni samand-e-umr saa koi subuk khiraam nahin barahna rahti hai shamshir-e-abru-e-qaatil misaal-e-tegh-e-ajal haajat-e-niyaam nahin bandhein vo haath hinaa se kiyaa hai jin se shahid kuchh aur yaar se manzur intiqaam nahin na daagh do shab-e-furqat kaa din ko naam na lo abhi charaagh na raushan karo ki shaam nahin jigar se siine se dil se guzar gai dam mein tiri tarah tiri talvaar ko qayaam nahin sitaara-e-falak-e-husn kahiye kam-sin hai abhi vo chaand kaa TukDaa mah-e-tamaam nahin phire talab mein jo duniyaa ki vo nahin din-daar misaal-e-daana jo gardish mein hai imaam nahin na khatt-e-mushaf-e-aariz kaa mo'taqid ho 'vazir' huruf jis mein hon allaah kaa kalaam nahin"

"abr kyaa ghir ghir ke aayaa khul gayaa bas sabaat-e-bahr-e-duniyaa khul gayaa raaz-e-dil kitnaa chhupaayaa khul gayaa haal is daulat-saraa kaa khul gayaa husn-e-aariz aarzi thaa khul gayaa khat ke aate hi lifaafa khul gayaa aankh se rumaal sarkaa baad-e-marg chashm-e-tar kaa aaj pardaa khul gayaa tum jo bole ho gayaa saabit dahan baaton hi baaton mein uqda khul gayaa kaT gayaa sar hal hui mushkil miri naakhun-e-khanjar se uqda khul gayaa be-zabaani baatein sunvaane lagi gaaliyon par munh tumhaaraa khul gayaa thaa qalam-band apni aazaadi kaa haal khat ko jab us ne lapeTaa khul gayaa khat pe khat laae jo murgh-e-naama-bar bole in murghon kaa Darbaa khul gayaa"

"hai naqsh-e-diram jo naqsh-e-paa hai aap aate to ghar diram-siraa hai dil jalva tiraa dikhaa rahaa hai shisha ye miraa pari-numaa hai sultaan-e-jahaan hai jo gadaa hai taimur har ik shikasta-paa hai insaan bhi qudrat-e-khudaa hai kyaa sang ko but banaa diyaa hai shirin hai dahan karo shukr-e-khand hansne mein tumhaari ik mazaa hai mazmun parvaane ban ke aaein shabdez-e-qalam charaagh-paa hai yaaraan-e-guzasht-gaan se hai uns zinda murdon pe mar rahaa hai aayaa nahin khud-farosh meraa goyaa mujhe mol le liyaa hai vo rashk-e-bahaar-o-ghairat-e-gul gul-gasht-e-chaman ko jo gayaa hai gulzaar huaa hai paani paani bulbul paani kaa bulbulaa hai jo chaahiye ishq mein kiyaa vo ham mar gae kahiye marhabaa hai hai jhuTaa kahun jo raast hai qad ye tausan-e-husn alif huaa hai munh jis ne diyaa vo rizq degaa goyaa ye dahaan aasiyaa hai tauba kaa na dar ho band yaarab jab tak dar-e-mai-kadaa khulaa hai hai shishaa-e-sabz garm qulqul tuuti maston kaa boltaa hai kyaa jism hai saaf us pari kaa goyaa qadd-e-aadam aaina hai begaana koi nazar na aayaa aaina bhi surat-aashnaa hai kyaa khauf-e-gunah 'vazir' ko ho haami sultaan-e-ambiyaa hai"

"hai ghalat gar tire daanton ko kahun taare hain ki dahan mushaf-e-naatiq hai ye sipaare hain apni hasti mein to aasaar-e-fanaa saare hain shaam ko zarre hain aur subh ko ham taare hain kyaa hi harjaai hasinaan-e-jahaan saare hain ye vo akhtar hain ki saabit nahin sayyaare hain zaaiqa honTon kaa badlegaa na missi maliye hongi ye qand siyah ab to shakar-paare hain baadshaahon ki tarah phirte hain Danke dete khaar-e-paa chob hain aur aable naqqaare hain chhup chale hain khat-e-shab-rang se rukhsaar-e-sabih din hai kam shaam ke aasaar ayaan saare hain saaghar-e-chashm ke sau dene paDeinge bose shisha-e-dil kabhi toDaa to ye kaffaare hain khat pe khat roz bahaa kar use pahunchaate hain ashk kaahe ko hain ye Daak ke harkaare hain aab jaari kiyaa eajaaz se ai bahr-e-karam ungliyaan kaahe ko hain nuur ke favvaare hain mushaf-e-rukh ko vo dikhlaaein agar tison din nai phabti mujhe sujhi kahun sipaare hain haath agar chhune se jal jaae yad-e-baizaa ho laal-e-lab us but-e-kaafir ke vo angaare hain raungTe kab hain in aainon mein hain paD gae baal haath zaanu pe kabhi yaar ne de maare hain pusht par hai jo sipar kham hue ho tegh ki tarah chaar phuul us ke tumhein phulon ke pushtaare hain ru-ba-ru rahti hai tasvir-e-tasavvur shab-o-roz ab to be-minnat-e-khalq aap ke nazzaare hain dekh kar tujh ko hasin kaTte hain bhule hain banaav kanghiyaan karte nahin sar pe ravaan aare hain dil pe jo guzri khabar ashkon ne di aa ke 'vazir' laaeq-e-khilat-e-rumaal ye harkaare hain"

"dam-bhar jo na dekhe tujhe ai rashk-e-pari aankh mizhgaan ki zabaanon se kare nauhagari aankh jam jaae tasavvur jo tire buuTe se qad kaa pathraa ke bane saaf aqiq-e-shajari aankh le lijiye shishe hain safed ashk nahin hain nam baada-kashi se ki gai shisha-gari aankh jaao jo chaman ko to kare farsh-e-rah-e-naaz bulbul jigar-o-faakhta dil kabk-e-dari aankh dekhaa jise bismil kiyaa taakaa jise maaraa us aankh se Dariye jo khudaa se na Dari aankh jumbish udhar us ko hai to gardish idhar is ko abru hai ki shamshir sipar hai ki phiri aankh kyaa diid ke qaabil tire kuche ki zamin hai har gaam hai naqsh-e-qadam-e-rah-guzri aankh tum jhaank rahe ho ye tumhein taak rahaa hai kyuun dida-e-rauzan pe aji tum ne dhari aankh kahti hi tiri naaf-o-shikam dekh ke bulbul rukhsaar-e-gul-e-tar pe hai nargis ki dhari aankh ai maah ye sab chashm-e-falak ke hain ishaare aise to na thi maail-e-be-daad-gari aankh nargis jo gulistaan mein hai to dasht mein aahu har rang mein dikhlaane lagi jalvagari aankh gad kaa kahin vo surma kaa dumbaala uThaae hai dast-e-mizha mein liye putli ki phiri aankh dekhe vo agar chashm-e-siyah aur ye khat-e-sabz nargis ki siyah aankh ho tuuti ki hari aankh"

"chhaantaa hai khaak kyaa tu ghar banaane ke liye fikr rahne ki na kar aayaa hai jaane ke liye aur ko kyaa ranj duun raahat uThaane ke liye ek tinke ko na chheDun aashiyaane ke liye barq thi betaab mere aashiyaane ke liye abr se bhi peshtar aae jalaane ke liye kaam aai murgh-e-gulshan ke miri kaahidgi le gayaa tinkaa samajh kar aashiyaane ke liye is chaman se gul chale bulbul garebaan phaaD kar hai junun tinke jo chunne aashiyaane ke liye ham ne kyuun maangi thi gulshan mein duaa-e-josh-e-gul ab jagah milti nahin hai aashiyaane ke liye phir vahi ham the vahi tum the mohabbat thi vahi sulh kar lete agar aankhein laDaane ke liye huun vo gham-dida hanse koi to main rone lagun kuchh bahaanaa chaahiye aansu bahaane ke liye saaya paD jaae agar zulf-e-daraaz-e-yaar kaa phir kahun main bhi tasalsul hai zamaane ke liye huun vo divaana ki ban kar ho vo majnun ki shabih meri miTTi lein agar lailaa banaane ke liye pahunchi hai shaane talak kyaa yaar ki zulf-e-rasaa dard kyuun paidaa huaa hai mere shaane ke liye jumla-tan hai chashm-e-nargis yaar teri diid ko gul hama-tan-gosh hain tere fasaane ke liye yuun miri qismat mein thaa parvaaz karnaa yaa nasib nochte hain tifl par mere uDaane ke liye kaun hogaa tere tiron kaa nishaana mere baad khaak le jaanaa miri tuuda banaane ke liye bazm-e-aalam mein khaDaa huun par chalaa jaataa huun main siikh li hai shama se raftaar jaane ke liye kyuun dil-e-betaab ko dikhlaayaa khaal-e-zer-e-zulf daam mein machhli nahin aane ki daane ke liye ho agar sar-gashtagi mein fikr-e-taamir-e-makaan khaak uDaa laae bagula ghar banaane ke liye ab kisi gul-ru ke dil mein kijiye ghar ai 'vazir' kyaa chaman mein tinke chuniye aashiyaane ke liye"

"aashiq-e-zulf-o-rukh-e-dildaar aankhein ho gaiin mubtilaa-e-kaafir-o-dindaar aankhein ho gaiin surkh palkein ho gaiin khun-baar aankhein ho gaiin dekh lo ab zakhm-e-daaman-daar aankhein ho gaiin dekh kar mahv-e-jamaal-e-yaar aankhein ho gaiin jaam-haa-e-sharbat-e-didaar aankhein ho gaiin aaiyo ai ashk ab bahne lagaa hai khun-e-garm bhejiyo paani ki aatish-baar aankhein ho gaiin laD gaiin tum se jo aankhein ho gai ik baar sulh kijiye do-tin baatein chaar aankhein ho gaiin kashti-e-mai le ke ai saaqi pahunch bahr-e-khudaa be tire mahfil mein dariyaa-baar aankhein ho gaiin hai tasavvur bas-ki aankhon mein khat-e-rukhsaar kaa aaine ki tarah jauhar-daar aankhein ho gaiin ai but-e-kaafir hai bas be-aib zaat allaah ki lab tire 'iisaa hue bimaar aankhein ho gaiin bah gaiin palkein ba-rang-e-khas miri ashkon ke saath ab to nazron mein gul-e-be-khaar aankhein ho gaiin chashm-e-baddur in ko gardish hai 'ajab andaaz se ai pari aahu-e-khush-raftaar aankhein ho gaiin mere paanv ki tarah haihaat ab gardish mein hain kis ki ye vaarafta-e-raftaar aankhein ho gaiin 'ain naadaani hai ab un se jo rakhiye chashm-daasht shakl-e-mizhgaan phir gaiin bezaar aankhein ho gaiin lakht-e-dil yaaqut mein aansu hain moti aab-daar aao dekho jauhari baazaar aankhein ho gaiin do to hain chashm-e-sukhan-go gar nahin hai ik dahan chup na rahiye qaabil-e-guftaar aankhein ho gaiin ishq-e-pinhaan dida-e-giryaan ne zaahir kar diyaa hansne ki jaa hai lab-e-izhaar aankhein ho gaiin ablaq-e-chashm-e-sanam kis naaz se gardish mein hai khuub kaave hote hain rahvaar aankhein ho gaiin har kisi ne aankh jab Daali gulu-e-saaf par hans ke farmaayaa gale kaa haar aankhein ho gaiin tol lete hain sadaa nazron mein jins-e-husn ko palla-e-mizaan miri ai yaar aankhein ho gaiin hai tasavvur roz-o-shab kis ki tilaai rang kaa chashm-e-nargis ki tarah zardaar aankhein ho gaiin kahte ho sab dekhte hain teri aankhon se mujhe sach kaho aghyaar ki bekaar aankhein ho gaiin chaliye ab sahraa se ku-e-yaar unhein dikhlaaiye aablon se paanv mein do-chaar aankhein ho gaiin phuul nargis ke banaae kab vahaan me'maar ne ye hamaari naqsh-bar-divaar aankhein ho gaiin ai khudaa shaahid hamaaraa summa-vajhullaah hai jab nigah ki but pe tujh se chaar aankhein ho gaiin aap saa in ko banaayaa ishq-e-tir-e-yaar ne hai siri taar-e-nigah sufaar aankhein ho gaiin pesh-e-nargis haath phailaae hain shaakhon se darakht kis ko dekheinge jo ab darkaar aankhein ho gaiin chup khaDe hain ban gae hain naqsh-bar-divaar ham aao dekho rauzan-e-divaar aankhein ho gaiin saaqi-o-minaa-o-saaghar ek aate hain nazar baada-e-vahdat se kyaa sarshaar aankhein ho gaiin rote rote hijr mein suuje hain ye chashmaan-e-tar jism laaghar ho gayaa tayyaar aankhein ho gaiin aashiq-e-abru huun karnaa dida-o-daanista qatl jauharon se tujh mein ai talvaar aankhein ho gaiin aankh ke Doron ne tere kuchh to hain dhaage diye ai sanam jo maail-e-zunnaar aankhein ho gaiin phir gayaa vo aa ke ab jaage to kyaa haasil 'vazir' so gae jab bakht tab bedaar aankhein ho gaiin"

"chale but-khaane ko khudaa-haafiz tum bhi zaahid kaho khudaa-haafiz tere kuche se pech uThaa ke chale gesu-e-mushkbu khudaa-haafiz dam-e-isaa se bhi shifaa na hui lo bas ai hamdamo khudaa-haafiz hai bahut zud-ranj dil meraa yaar hai tund-khu khudaa-haafiz us sanam ko khudaa kahun na kahun hai sukhan gu-magu khudaa-haafiz dil ko but-khaana kar ke kaabe chale zaahido zaahido khudaa-haafiz hai firangan ke gore haath mein dil jaan kaa saahibo khudaa-haafiz dair se misl-e-naala-e-naaqus jaate hain ai buto khudaa-haafiz baat bhi ki to ye kahaa shab-e-vasl jaaein ham tum kaho khudaa-haafiz shah-e-khubaan ke gham mein jaan chali ai 'vazir' ab kaho khudaa-haafiz"

"khudaa-numaa hai but-e-sang-e-aastaana-e-ishq chalungaa paa-e-nigah ban ke su-e-khaana-e-ishq na kam hon sikka-e-daagh-e-dil-e-yagaana-e-ishq bharaa paDaa rahe yaarab sadaa khazaana-e-ishq jabin-e-qais bani sang-e-aastaana-e-ishq junun hai khema-e-lailaa siyaah-khaana-e-ishq mudaam dil mein rahe daagh-e-ulfat-e-saaqi na be-charaagh ho yaarab sharaab-khaana-e-ishq ye mahfil-e-tarab-e-husn hai nahin maqtal sadaa gulu-e-burida ki hai taraana-e-ishq ye kah ke phirti hai din raat aasiyaa-e-falak mile to khirman-e-mah de ke luun main daana-e-ishq hai aaftaab piyaala farishta-khu saaqi kham-e-falak hai subu-e-sharaab-khaana-e-ishq bas ek haath mein do ho ke main zamin pe giraa qazaa jo aai adaa ho gayaa dogaana-e-ishq har ek gaam pe dil pistaa hai ablaq-e-chashm magar hai surme kaa dumbaala taaziyaana-e-ishq jalaayaa tuur ko ik dam mein saaiqa ban kar sharar-fishaan jo huaa sang-e-aastaana-e-ishq ho khaana-e-sadaf-e-dil na kis tarah pur-nur ki aap hai guhar-e-shab-charaagh daana-e-ishq buto khudaa ne kahaa fis-samaa-e-rizqokum aap milaa hai mujh ko ye haft aasiyaa se daana-e-ishq ye sach masal hai buto sab kaa hai khudaa razzaaq nasib-e-taair-e-dil hai azal se daana-e-ishq jo khaal ban ke khat-e-rukh mein dil rahe meraa kahun main khirman-e-mah mein milaa ye daana-e-ishq kisi ke abru-e-pur-kham kaa dhyaan rahtaa hai hamaaraa kaaba-e-dil hai siyaah-khaana-e-ishq sadaa-e-maatam-e-dil sun ke khush vo hote hain navaa-e-sina-zani hai ki shaadiyaana-e-ishq jo shauq-e-did hai muusaa ki tarah ek na sun ki lantaraani-e-ishq hai taraana-e-ishq naqaab udhar vo uThaaein idhar main aah karun samand-e-husn pe paD jaae taaziyaana-e-ishq jo toliye ise kaunain ki taraazu mein garaan ho vazn mein na aasiyaa se daana-e-ishq farogh-e-bazm-e-tasavvur hai yaad pistaan ki habaab-e-husn bane hain charaagh-e-khaana-e-ishq khayaal-e-gauhar-e-dandaan mein ham jo rote hain sarishk-e-dida-e-tar hai dur-e-yagaana-e-ishq hai mere dil ki tarah is se ye pareshaan-haal milaa hai zulf ko husn-e-siyaah-khaana-e-ishq chaDhaa jo daar pe aashiq kaa sar huaa sardaar judaa hai khaana-e-aalam se kaarkhaana-e-ishq khudaa kaa ghar ho jo TuuTe jihaad-e-nafs se dil kharaab ho to bane laa-makaan ye khaana-e-ishq vo dil lagaa ke sunein daastaan ki surat bayaan kijiye us husn se fasaana-e-ishq 'vazir' tukhm-e-mohabbat ko dil mein bo apne zamin vo shor hai jis mein uge na daana-e-ishq"

"tangi-e-dahan se hai aDi baat chhoTaa saa hai munh tiraa baDi baat kyaa charb-zabaan vo shoala-ru hai lab tak aa kar phisal paDi baat matlab par agar zabaan do tum ho munh se abhi nikal khaDi baat dil shisha-e-saaat apnaa ban jaae saaqi na kare jo do ghaDi baat hain peT ki halki vo sadaf-saan moti ki tarah nikal paDi baat"

"main saraapaa mazhar-e-ism-e-khudaa vallaah huun ham-safiro is chaman mein murgh-e-bismillaah huun kis taraf jaaun dikhaa do yaa mohamaad raah-e-haq yaan har ik gumraah kahtaa hai main khizr-e-raah huun ai masihaa teri zulfon ki daraazi dekh kar kahti hi umr-e-khizar main gesu-e-kotaah huun aasmaan par bhi siyah-bakhti mein hai meraa dimaagh khaal-e-ru-e-mehr huun daagh-e-jabin-e-maah huun kah rahi hai aasmaan se yaar ke ghar ki zamin tuur huun sahraa-e-aiman huun tajalli-gaah huun baiThnaa kaisaa idhar aayaa udhar raahi huaa din jo huun to mukhtasar huun shab jo huun kotaah huun allaah allaah kyaa hai in ke paanv ki Thokar kaa lutf hai har ik but ki tamannaa kaash sang-e-raah huun roz-e-mahshar se 'vazir' afzun hai is kaafir kaa tuul ab bhi kahti hai shab-e-furqat bahut kotaah huun"

"gauhar-e-ashk se labrez hai saaraa daaman aaj-kal daaman-e-daulat hai hamaaraa daaman ai junun baad-e-bahaari se nahin jumbish mein kuchh garebaan se kartaa hai ishaaraa daaman vasl ki raat hai bigDo na baraabar to rahe phaT gayaa meraa garebaan tumhaaraa daaman jaama-chin ne nahin ye phuul chune nargis ke saikDon aankhon se kartaa hai nazaaraa daaman bahut ai dast-e-junun tang-nazar aataa hai baandh de daaman-e-sahraa se hamaaraa daaman khuub pahunchaa diyaa ai dast-e-junun haathon-haath mil gayaa aaj garebaan se saaraa daaman aamad aamad mire ashkon ki magar sun li hai jhaaD kar gard jo sahraa ne sanvaaraa daaman"