Ghazal

"gard-e-firaaq ghaaza kash-e-aaina na ho chaaho jo tum to apne tasarruf mein kyaa na ho sajde ke har nishaan pe hai khuun saa jamaa huaa yaaro ye us ke ghar kaa kahin raasta na ho zakhmon ki mishalein liye guzraa hai dil se kaun yaadon kaa koi bhaTkaa huaa qaafila na ho kab se khaDaa huun ek do-raahe pe but banaa sab kuchh jo dekhtaa ho magar boltaa na ho chumo lagaao aankhon se sar par rakkho use ye zindagi varaq kisi injil kaa na ho sau baar ik gali mein mujhe le gayaa ye vahm khiDki se koi maslahatan jhaanktaa na ho sharmaa gae the donon hi pahli nazar ke baad shaayad tumhein to yaad bhi vo vaaqia na ho laao na mere saamne aariz ke aaftaab chehre pe koi harf-e-tamannaa likhaa na ho maazi ke reg-zaar pe rakhnaa sambhal ke paanv bachchon kaa is mein koi gharaundaa banaa na ho ho kar judaa bhi us se 'naimi' main ji to luun lekin ye Dar hai is se kahin vo khafaa na ho"

"bahaar ban ke khizaan ko na yuun dilaasaa de nigaahein pher le apni na khud ko dhokaa de masaaf-e-zist hai bhar de lahu se jaam miraa na muskuraa ke mujhe saaghar-e-tamannaa de khaDaa huaa huun sar-e-raah muntazir kab se ki koi guzre to gham kaa ye bojh uThvaa de vo aankh thi ki badan ko jhulas gai qurbat magar vo shola nahin ruuh ko jo garmaa de hujum-e-gham vo rahaa umr bhar dar-e-dil par khushi isi mein rahi ye hujum-e-rastaa de likhaa hai kyaa mire chehre pe tu jo sharmaayaa zabaan se na bataa aainaa hi dikhlaa de main laDkhaDaa saa gayaa huun vafaa ke vaade par pakaD ke haath mujhe ghar talak to pahunchaa de sukut-e-anjum-o-mah ne chhupaa liyaa hai jise jhuki nazar na kisi ko vo raaz batlaa de har ek dard kaa darmaan hai log kahte hain magar vo dard 'naimi' jo khud masihaa de"

"duaa ko haath miraa jab kabhi uThaa hogaa qazaa-o-qadr kaa chehra utar gayaa hogaa jo apne haathon luTe hain bas is pe zinda hain khudaa kuchh un ke liye bhi to sochtaa hogaa tiri gali mein koi saae raat bhar ab bhi suraagh-e-jannat gum-gashta DhunDtaa hogaa jo gham ki aanch mein pighlaa kiyaa aur aah na ki vo aadmi to nahin koi devtaa hogaa tumhaare sang-e-taghaaful kaa kyuun karein shikva is aaine kaa muqaddar hi TuTnaa hogaa hai mere qatl ki shaahid vo aastin bhi magar main kis kaa naam luun sau baar sochnaa hogaa ye meri pyaas ke saaghar tere labon ki sharaab ravaaj-o-rasm-e-mohabbat kaa mojaza hogaa phir aarzu ke khanDar rang-o-bu mein Duub chale fareb-khurda koi khvaab dekhtaa hogaa sitaare bhi tiri yaadon ke bujhte jaate hain gham-e-hayaat kaa suraj nikal rahaa hogaa sadaa kise dein 'naimi' kise dikhaaein zakhm ab itni raat gae kaun jaagtaa hogaa"

"is tilsim-e-roz-o-shab se to kabhi niklo zaraa kam se kam vijdaan ke sahraa hi mein ghumo zaraa naam kitne hi likhe hain dil ki ik mehraab par hogaa in mein hi tumhaaraa naam bhi DhunDo zaraa bad-gumaani ki yahi ghairon ko kaafi hai sazaa muskuraa kar phir usi din ki tarah dekho zaraa vaqt ke patthar ke niche ik dabaa chashma huun main aao pyaaso mil ke ye patthar uThaao to zaraa husn ik dariyaa hai sahraa bhi hain us ki raah mein kal kahaan hogaa ye dariyaa ye bhi to socho zaraa do kalon ke biich mein ik aaj huun uljhaa huaa meri is kam-fursati ke karb ko samjho zaraa vusat-e-kaun-o-makaan bhi ab hui jaati hai tang aur bhi kuchh ai junun vaalo abhi simTo zaraa thak gae hoge bahut pur-pech thi chaahat ki raah aao meri god mein sar rakh ke sustaa lo zaraa ek miTte lafz ke bhi kaam aa jaao kabhi sang-e-dil par miTne se pahle mujhe likh lo zaraa hai taaaqub mein 'naimi' saaya saa ik roz o shab dost hi shaayad ho koi muD ke to dekho zaraa"

"ghubaar-e-dard se saaraa badan aTaa niklaa jise bhi khanda-ba-lab dekhaa gham-zadaa niklaa ab ehtiyaat bhi aur kyaa ho be-libaas to huun ik aastin se maanaa ki azhdahaa niklaa mire khulus pe shak ki to koi vajh nahin mire libaas mein khanjar agar chhupaa niklaa lagaa jo piiTh mein neza to samjhe dushman hai magar palaT ke jo dekhaa to aashnaa niklaa mire lahu se hai rangin jabin-e-subh to kyaa chalo ki zulmat-e-shab kaa to hauslaa niklaa ye haath raakh mein khvaabon ki Daalte to ho magar jo raakh mein sho'la koi dabaa niklaa sunaa thaa hadd-e-tabassum hai aansuon se qarib baDhe jo aage to barson kaa faaslaa niklaa vo ek harf-e-tamannaa jo kahte Darte the zabaan pe aayaa to un kaa hi mudda'aa niklaa kulaah kaj kiye din bhar jo shakhs phirtaa thaa gali mein shaam ko dekhaa to vo gadaa niklaa tulu' subh 'naimi' jahaan se honi thi usi ufuq se andheron kaa silsilaa niklaa"

"har insaan apne hone ki sazaa hai bhare baazaar mein tanhaa khaDaa hai nae darbaanon ke pahre biThaao hujum-e-dard baDhtaa jaa rahaa hai rahe ham hi jo har patthar ki zad mein hamaari sar-bulandi ki khataa hai mahakte gesuon ki raat guzri savaa neze pe ab suraj khaDaa hai mire khvaabon ki chikni siDhiyon par na jaane kis kaa but TuuTaa paDaa hai vo shole hon lahu ho haadse hon miri hi zindagi par tabsira hai tiri zulfein to hain badnaam yunhi mujhe din ke ujaalon ne Dasaa hai chalo chupke se kuchh but aur rakh aaein dar-e-kaaba abhi shaayad khulaa hai utar kar to fasil-e-shab se dekho sahar ne khud-kushi kar li sunaa hai abhi taaq-e-tasavvur par 'naimi' charaagh-e-lazzat-e-shab jal rahaa hai"

"honkte dasht mein ik gham kaa samundar dekho tum kisi roz agar dil mein utar kar dekho niklo saDkon pe to hansti hui laashon se milo band aankhein jo karo qatl kaa manzar dekho aanch qurbat ki na pighlaa de kahin taar-e-nazar shola-e-husn ko kuchh duur se bach kar dekho ye to kahte ho ki khud main ne kaTaai gardan koi haathon mein havaa ke bhi to khanjar dekho aastinein to kahin chupke se dho lo yaaro ho kisi ko na shubah qatl kaa tum par dekho dar o divaar se uThte hain ye shole kaise dosto chal ke zaraa ghar ke to andar dekho haDDiyaan gal chukin ab to na ukheDo un ko DhunD lein phir ye nayaa koi na paikar dekho main bhi is safha-e-hasti pe ubhar saktaa huun rang to tum miri tasvir mein bhar kar dekho ab to khilti hui kaliyon mein na DhunDo mujh ko raakh hote hue ik shole kaa manzar dekho pheink do TuuTi ummidon ke ye TukDe baahar dil mein rah jaae kirich koi na gaD kar dekho liye aaina vafaaon kaa kahaan phirte ho hon na haathon mein kahin andhon ke patthar dekho ek muddat se hai logon ko 'naimi' ki talaash qasr-e-tanhaai ki divaarein giraa kar dekho"