Ghazal

"jo aaine se teri jalva-saamaani nahin jaati kisi bhi dekhne vaale ki hairaani nahin jaati kabhi ik baar haule se pukaaraa thaa mujhe tum ne kisi ki mujh se ab aavaaz pahchaani nahin jaati bhari mahfil mein mujh se pher li thiin be-sabab nazrein vo din aur aaj tak un ki pashemaani nahin jaati pise jaate hain dil har-gaam pe shor-e-qayaamat se khiraam-e-naaz teri fitna-saamaani nahin jaati gavaaraa hi na thi jin ko judaai meri dam-bhar ki unhin se aaj meri shakl pahchaani nahin jaati vo mere haath kaa shokhi se jaanaa un ke daaman tak vo un kaa naaz se kahnaa ki naadaani nahin jaati garebaan ahl-e-vahshat ke siyaa kartaa thaa hosh ik din aur ab mujh se hi meri chaak-daamaani nahin jaati"

"shisha hi chaahiye na mai-e-arghavaan mujhe be-maange jo mile vahi kaafi hai haan mujhe ai shokhi-e-nigaah zaraa ehtiyaat rakh is bazm mein hai paas-e-hadis-e-butaan mujhe yaarab mire gunaah kyaa aur ehtisaab kyaa kuchh di nahin hai khizr si umr-e-ravaan mujhe chuntaa thaa raah-e-zist ke khaaron ko main hanuz hai sab abas ajal ne kahaa naa-gahaan mujhe lagtaa hai ik hujum mein gum hai miraa vajud Dasti hain phir bhi kis liye tanhaaiyaan mujhe un ke liye hain atlas-o-kamkhvaab ke sarir tan Dhaankne ko kaafi hain kuchh dhajjiyaan mujhe kyaa kyaa sitam zamaane ke main sah gayaa 'anis' marne ke baad yaad karoge miyaan mujhe"

"nazar milte hi saaqi se giri ik barq si dil par vo uTThaa shor TuuTe jaam ki ban aai mahfil par usi andaaz se us ne likhi hai daastaan dil par gale mein pyaar se baahein hamaail aur chhuri dil par koi ik haadisa ho gar karein ham zikr bhi us kaa guzarte hain yahaan to haadse par haadse dil par na manzil hai na jaada hai na koi raahbar baaqi miraa zauq-e-safar baaqi hai ik hangaama-e-dil par tavaaf-e-maah karnaa aur khalaa mein saans lenaa kyaa bharosa jab nahin insaan ko insaan ke dil par vahi maujein jo mujh ko khinch kar laai hain tufaan mein unhein maujon ke saath ik roz mein pahunchungaa saahil par masarrat aur raahat se na thiin raanaaiyaan kaafi 'anis' ehsaan gham ke bhi bahut hain naa-tavaan dil par"

"firaaq-e-yaar mein kuchh kahiye samjhaayaa nahin jaataa dil-e-vahshi kisi surat se bahlaayaa nahin jaataa hamin ne chun liye phulon ke badle khaar daaman mein faqat gulchin ke sar ilzaam Thahraayaa nahin jaataa sar-e-baazaar rusvaa ho gae kyaa ham na kahte the kisi saudaai ke munh is qadar aayaa nahin jaataa garebaan thaam leinge khaar to mushkil bahut hogi gulaabon ki ravish par itnaa iThlaayaa nahin jaataa mahak jaaegi meri khaamushi bhi bu-e-gul ho kar nidaa-e-haq ko qaid-o-band mein laayaa nahin jaataa udhar vo ahd-o-paimaan-e-vafaa ki baat karte hain idhar mashq-e-sitam bhi tark farmaayaa nahin jaataa 'anis' uTTho nai fikron se raahein zau-fishaan kar lo maaal-e-laghzish-e-maazi pe pachhtaayaa nahin jaataa"

"chalo ye sach hi sahi hogaa naa-gahaan guzre hamaare dar se magar aap mehrbaan guzre jidhar bhi aap gae bas gae hain viraane ujaD gae hain chaman ham jahaan jahaan guzre hamein miTaane ki gar koshishein tamaam huiin to ye bhi kahiye ki ham kitne sakht-jaan guzre vo subh-o-shaam ki ranginiyaan tamaam huiin saubaton ki kaDi dhuup hai jahaan guzre vo apne daaman-e-paara pe bhi nigaah kare jahaan mein mujh pe uThaa kar jo ungliyaan guzre hayaat-o-maut kaa hal kar chuke hain har uqda ab ham ko khauf nahin laakh imtihaan guzre 'anis' aap ko dekhaa hai har ghaDi masruf kabhi to chain se do-chaar din miyaan guzre"

"tire gesuon ke saae mein jo ek pal rahaa huun abhi tak hai yaad mujh ko abhi tak bahal rahaa huun main vo rind-e-nau nahin huun jo zaraa si pi ke bahkun abhi aur aur saaqi ki main phir sambhal rahaa huun nahin gham na mil sakegi mujhe shaikh teri jannat mujhe aarzu nahin hai na main haath mal rahaa huun jo na mere kaam aae jo na meri baat maane main vo dil badal rahaa huun main vo dil badal rahaa huun mujhe jaada-e-talab mein rah-e-pur-khatar kaa kyaa gham ki qadam jidhar uThe hain usi samt chal rahaa huun jo giraa to phir uThungaa ki javaan hai azm meraa mujhe tum na do sahaaraa main agar phisal rahaa huun vo dabaa ke meraa daaman vo jhukaa ke un ki nazrein nahin bhultaa ye kahnaa abhi main bhi chal rahaa huun"

"ab gham kaa koi gham na khushi ki khushi mujhe aakhir ko raas aa hi gai zindagi mujhe vo qatl kar ke mujh ko pashemaan hue to kyaa lauTaa sakeinge phir na miri zindagi mujhe saare jahaan mein hoti hai amn-o-amaan ki baat lekin nazar na aai kahin aashti mujhe neza uThaae phirti hai har raah mein qazaa har moD par hiraas mili zindagi mujhe main ghunT ghunT jaam se bahlaaun ji ko kyaa be-khauf kaash kar hi de tishna-labi mujhe ik lazzat-e-gunaah thi kyaa lazzat-e-gunaah taa-umr raas aai na phir bandagi mujhe kuchh aarzu nahin ki farishta banun 'anis' kaafi hai haan jo log kahein aadmi mujhe"