Ghazal

"har ek lafz mein siine kaa nuur Dhaal ke rakh kabhi-kabhaar to kaaghaz pe dil nikaal ke rakh jo doston ki mohabbat se ji nahin bhartaa to aastin mein do-chaar saanp paal ke rakh tujhe to kitni bahaarein salaam bhejeingi abhi ye phuul saa chehra zaraa sambhaal ke rakh yahaan se dhuup ke neze buland hote hain tamaam chhaanv ke qisson pe khaak Daal ke rakh mahak rahe hain kai aasmaan miTTi mein qadam zamin-e-mohabbat pe dekh-bhaal ke rakh dil-o-dimaagh Thikaane pe aane vaale hain ab us kaa zikr kisi aur din pe Taal ke rakh"

"dilon se khauf ke aaseb-o-jin nikaaltaa hai vahi charaagh jalaataa hai din nikaaltaa hai ajiib tesha hai mazdur kaa pasina bhi pahaaD kaaT ke raasta kaThin nikaaltaa hai ye baadshaah nahin hai faqir hai suraj hamesha raat ki jholi se din nikaaltaa hai zaraa si der mein koi gulaab toDegaa jo apne coat ke collar se pin nikaaltaa hai usi ke naam se mansub hai ghazal apni jo naam phuul khilaataa hai din nikaaltaa hai"

"khayaal jaan se baDh kar safar mein rahtaa hai vo meri ruuh ke andar safar mein rahtaa hai jo saare din ki thakan oDh kar main sotaa huun to saari raat miraa ghar safar mein rahtaa hai janam janam se miri pyaas sar paTakti hai janm janm se samundar safar mein rahtaa hai miraa yaqin karo us ke paanv mein til hai isi liye vo baraabar safar mein rahtaa hai main dil hi dil mein jise pujne lagaa huun bahut vo devtaa nahin patthar safar mein rahtaa hai"

"zanjir to pairon se thakan baandhe hue hai divaana magar sar se kafan baandhe hue hai khushbu ke bikharne mein zaraa der lagegi mausam abhi phulon ke badan baandhe hue hai dastaar mein taaus ke par baandhne vaalaa gardan mein masaail ki rasan baandhe hue hai shaayad kisi majzub-e-mohabbat ko khabar ho kis sehr se dharti ko gagan baandhe hue hai mearaaj-e-aqidat hai ki taaviz ki surat baazu pe koi khaak-e-vatan baandhe hue hai suraj ne andheron ki nazar baandh ke puchhaa ab kaun ujaalon kaa sukhan baandhe hue hai"

"ham sab ko bataate rahte hain ye baat puraani kaam ki hai das biis gharon mein charche hon tab jaa ke javaani kaam ki hai ye vaqt abhi tham jaaegaa maahaul mein dil ram jaaegaa bas aap yunhi baiThe rahiye ye raat suhaani kaam ki hai aasaan bhi hai dushvaar bhi hai dukh-sukh kaa baDaa baazaar bhi hai maalum nahin to mujh se suno ye duniyaa divaani kaam ki hai mashhur bhi hain badnaam bhi hain khushiyon ke nae paighaam bhi hain kuchh gham ke baDe inaam bhi hain paDhiye to kahaani kaam ki hai jo log chale hain ruk ruk kar hamvaar zamin par jhuk jhuk kar vo kaise bataaeinge tum ko dariyaa ki ravaani kaam ki hai"

"vo jis ke naam mein lazzat bahut hai usi ke zikr se barakat bahut hai zaraa mahfuz raston se guzarnaa tumhaari shahr mein shohrat bahut hai abhi suraj ne lab khole nahin hain abhi se dhuup mein shiddat bahut hai mujhe sone ki qimat mat bataao main miTTi huun miri azmat bahut hai kisi ki yaad mein khoe raheinge gunah-gaaron ko ye jannat bahut hai jinhein masruf rahne kaa maraz thaa unhein bhi aaj-kal fursat bahut hai jahaan par khushbuein thiin zindagi ki usi mahfil mein ab ghibat bahut hai kabhi to husn kaa sadqa nikaalo tumhaare paas ye daulat bahut hai ghazal khud kah ke paDhnaa chaahte ho miyaan is kaam mein mehnat bahut hai havaa to tham chuki lekin diyon ke ravayyon mein abhi dahshat bahut hai"

"shaayad nae safar ki kahaani likheinge log paani ko khuun khuun ko paani likheinge log ai aasmaan harf ko phir eatibaar de varna haqiqaton ko kahaani likheinge log kaaghaz pe ab lahu ki lakirein bhi aa gaiin kab tak hamaare khuun ko paani likheinge log jab chaand muskuraaegaa phulon ki shaakh par phir to har ek raat suhaani likheinge log is saadgi mein rang-e-mohabbat zarur hai 'anjum' tiri ghazal ke maaani likheinge log"

"dil kaa gulaab main ne jise chuum kar diyaa us ne mujhe bahaar se mahrum kar diyaa ab phuul kyaa khilein ki jahaan pattiyaan nahin mausam ne shaakh shaakh ko masmum kar diyaa ghar-baar chhoD kar vo faqiron se jaa mile chaahat ne baadshaahon ko mahkum kar diyaa in aansuon se dil ki tapish aur baDh gai baarish ne aur bhi mujhe maghmum kar diyaa ye aarzu hai us pe koi naat likh sakun jis ne gunaahgaar ko maasum kar diyaa 'anjum' janaab-e-mir kaa ye faiz-e-khaas hai ham ne bhi apne dard ko manzum kar diyaa"

"lahje ki udaasi kam hogi baaton mein khanak aa jaaegi do-roz hamaare saath raho chehre pe chamak aa jaaegi ye chaand-sitaaron ki mahfil maalum nahin kab raushan ho tum paas raho tum saath raho jazbon mein kasak aa jaaegi kuchh der mein baadal barseinge kuchh der mein saavan jumeinge tum zulf yuun hi lahraae raho mausam mein sanak aa jaaegi jab us ki malaahat ke qisse likkhungaa ghazal ke sheron mein har rukhe-phike misre mein taasir-e-namak aa jaaegi suraj ko zaraa kuchh Dhalne do kuchh vaqt kaa dariyaa bahne do jo dhuup abhi tak sar par hai vo paanv talak aa jaaegi ye soch ke tere qadmon ki kuchh khaak uDaa di gulshan mein har phuul mein tere chehre ki thoDi si jhalak aa jaaegi jis baat kaa matlab khushbu hai har gaanv ke kachche raste par us baat kaa matlab badlegaa jab pakki saDak aa jaaegi ye pyaar kaa din hai pyaar kaa din iqraar karo 'anjum'-saahab is din ki zaraa si qadr karo jivan mein mahak aa jaaegi"

"zahar lagtaa hai ye aadat ke mutaabiq mujh ko kuchh munaafiq bhi bataate hain munaafiq mujh ko din chaDhe dhuup ki baatein nahin suntaa koi chaandni-raat pukaare tiraa aashiq mujh ko kashtiyaan reshmi khvaabon ki jalaa kar jaanaa kis ki chaahat ne banaa rakkhaa hai 'taariq' mujh ko aap ke naam pe main had mein rahaa huun lekin aap ke naam pe duniyaa ne kiyaa diq mujh ko main ne suraj ki tarah khud ko banaayaa jis din dekhne aaeinge ye maghrib-o-mashriq mujh ko aap kahte to zaraa dil ko tasalli hoti kahne vaalon ne kahaa aashiq-e-saadiq mujh ko"

"jhuTi baatein jhuTe log sahte raheinge sachche log hariyaali par boleinge saavan ke sab andhe log do paise mein mahnge hain kirdaaron ke saste log meri guzaarish kyaa sunte unche qad ke chhoTe log ghair to aansu pochheinge dhokaa deinge apne log ek jagah kam milte hain itne saare achchhe log is jivan mein ghuum chuke aadhi duniyaa puure log barson mein phir dekheinge bhole-bhaale pyaare log sadiyon pahle hote the apni dhun ke pakke log har mahfil mein karte hain ochhi harakat ochhe log"

"khizaan mili abhi tak kahin bahaar mile safar mein pyaar kaa mausam to baa-vaqaar mile main aise dar kaa gadaa huun jahaan pe moti kyaa hazaar baar mujhe sang aab-daar mile khushi kaa nuur to ik-baargi milaa hai tumhein hamein to gham ke andhere bhi qist-vaar mile tiri chamak kaa taqaazaa nahin zarurat hai tire khamir mein thoDaa saa inkisaar mile ye aarzu hai ki ab raushni ke qisse hain mire charaagh ko suraj kaa e’tibaar mile main khush-nasib bahut huun ki mujh ko duniyaa mein qadam qadam pe mohabbat ke shaahkaar mile main aasmaanon zaminon ki had milaa dungaa jo chaar-roz kaa sach-much mein ikhtiyaar mile"