Ghazal

"ghuTan si hone lagi us ke paas jaate hue main khud se ruuTh gayaa huun use manaate hue ye zakhm zakhm manaazir lahu lahu chehre kahaan chale gae vo log hanste gaate hue na jaane khatm hui kab hamaari aazaadi taalluqaat ki paabandiyaan nibhaate hue hai ab bhi bistar-e-jaan par tire badan ki shikan main khud hi miTne lagaa huun use miTaate hue tumhaare aane ki ummid bar nahin aati main raakh hone lagaa huun diye jalaate hue"

"ye baar-e-gham bhi uThaayaa nahin bahut din se ki us ne ham ko rulaayaa nahin bahut din se chalo ki khaak uDaaein chalo sharaab piyein kisi kaa hijr manaayaa nahin bahut din se ye kaifiyat hai meri jaan ab tujhe kho kar ki ham ne khud ko bhi paayaa nahin bahut din se har ek shakhs yahaan mahv-e-khvaab lagtaa hai kisi ne ham ko jagaayaa nahin bahut din se ye khauf hai ki ragon mein lahu na jam jaae tumhein gale se lagaayaa nahin bahut din se"

"tiri samt jaane kaa raasta nahin ho rahaa rah-e-ishq mein koi moajiza nahin ho rahaa koi aaina ho jo khud se mujh ko milaa sake miraa apne-aap se saamnaa nahin ho rahaa tu khudaa-e-husn-o-jamaal hai to huaa kare teri bandagi se miraa bhalaa nahin ho rahaa koi raat aa ke Thahar gai miri zaat mein miraa raushni se bhi raabta nahin ho rahaa use apne honTon kaa lams do ki ye saans le ye jo peD hai ye haraa-bharaa nahin ho rahaa"

"gulaab chaandni-raaton pe vaar aae ham tumhaare honTon kaa sadqa utaar aae ham vo ek jhiil thi shaffaaf niil paani ki aur us mein Duub ko khud ko nikhaar aae ham tire hi lams se un kaa khiraaj mumkin hai tire baghair jo umrein guzaar aae ham phir us gali se guzarnaa paDaa tiri khaatir phir us gali se bahut be-qaraar aae ham ye kyaa sitam hai ki is nashsha-e-mohabbat mein tire sivaa bhi kisi ko pukaar aae ham"

"dil ki gali mein chaand nikaltaa rahtaa hai ek diyaa ummid kaa jaltaa rahtaa hai jaise jaise yaadon ki lau baDhti hai vaise vaise jism pighaltaa rahtaa hai sargoshi ko kaan taraste rahte hain sannaaTaa aavaaz mein Dhaltaa rahtaa hai manzar manzar ji lo jitnaa ji paao mausam pal pal rang badaltaa rahtaa hai raakh hui jaati hai saari hariyaali aankhon mein jangal saa jaltaa rahtaa hai tum jo gae to bhuul gae saari baatein vaise dil mein kyaa kyaa chaltaa rahtaa hai"

"tumhaari yaad ke dipak bhi ab jalaanaa kyaa judaa hue hain to ahd-e-vafaa nibhaanaa kyaa basit hone lagi shahr-e-jaan pe taariki khulaa huaa hai kahin par sharaab-khaana kyaa khaDe hue ho miyaan gumbadon ke saae mein sadaaein de ke yahaan par fareb khaanaa kyaa har ek samt yahaan vahshaton kaa maskan hai junun ke vaaste sahraa o aashiyaana kyaa vo chaand aur kisi aasmaan pe raushan hai siyaah raat hai us ki gali mein jaanaa kyaa"

"zamin-e-dil ik arse baad jal-thal ho rahi hai koi baarish mere andar musalsal ho rahi hai lahu kaa rang phailaa hai hamaare canvas par teri tasvir ab jaa kar mukammal ho rahi hai havaa-e-taaza kaa jhonkaa chalaa aayaa kahaan se ki muddat baad si paani mein halchal ho rahi hai tujhe dekhe se mumkin maghfirat ho jaae us ki tere bimaar ki bas aaj aur kal ho rahi hai vo saahab aa hi gai band-e-qabaa kholne lage hain paheli thi jo ik uljhi hui hal ho rahi hai"

"vo maahtaab abhi baam par nahin aayaa miri duaaon mein shaayad asar nahin aayaa bahut ajiib hai yaaron bulandiyon kaa tilism jo ek baar gayaa lauT kar nahin aayaa ye kaaenaat ki vusat khuli nahin mujh par main apni zaat se jab tak guzar nahin aayaa bahut dinon se hai be-shakl si meri miTTi bahut dinon se koi kuza-gar nahin aayaa bas ek lamhe ko be-pairaahan use dekhaa phir is ke baad mujhe kuchh nazar nahin aayaa ham ab bhi dasht mein khema lagaae baiThe hain hamaare hisse mein apnaa hi ghar nahin aayaa zamin baanjh na ho jaae kuchh kaho 'azhar' sukhan ki shaakh pe kab se samar nahin aayaa"

"mujh ko vahshat hui mire ghar se raat teri judaai ke Dar se teri furqat kaa habs thaa andar aur dam ghuT rahaa thaa baahar se jism ki aag bujh gai lekin phir nadaamat ke ashk bhi barse ek muddat se hain safar mein ham ghar mein rah kar bhi jaise beghar se baar-haa teri justuju mein ham tujh se milne ke baad bhi tarse"

"hui na khatm teri rahguzaar kyaa karte tere hisaar se khud ko faraar kyaa karte safina gharq hi karnaa paDaa hamein aakhir tire baghair samundar ko paar kyaa karte bas ek sukut hi jis kaa javaab honaa thaa vahi savaal miyaan baar baar kyaa karte phir is ke baad manaayaa na jashn khushbu kaa lahu mein Duubi thi fasl-e-bahaar kyaa karte nazar ki zad mein nae phuul aa gae 'azhar' gai ruton kaa bhalaa intizaar kyaa karte"