Ghazal

"kise khabar hai main dil se ki jaan se guzrungaa jo baar baar saf-e-dushmanaan se guzrungaa yaqin bhi tujhe aaegaa meri hasti par yahi nahin ki main tere gumaan se guzrungaa har ek shai miri jaanib hi multafit hogi main tere saath agar shahr-e-jaan se guzrungaa andheri raat kaa mujh ko zaraa bhi khauf nahin kai charaagh jaleinge jahaan se guzrungaa zamin zaad huun 'saifi' zamin pe rahnaa hai na kahkashaan na kisi aasmaan se guzrungaa"

"zaahir miri shikast ke aasaar bhi nahin mujh ko yaqin fath kaa is baar bhi nahin qaid-e-makaan se dekhiye kab tak rihaai ho ab tak to bad-gumaan dar-o-divaar bhi nahin kis sehr ki giraft mein aae hue hain ham aankhein bhi hain khuli hui bedaar bhi nahin jo kuchh ki dil mein ho bhari mahfil mein kah sake har shakhs mein ye jurat-e-izhaar bhi nahin kyaa asl kaaenaat ko 'saifi' samajh sakun mujh par ayaan to zaat ke asraar bhi nahin"

"khud apnaa eatibaar ganvaataa rahaa huun main zarre ko aaftaab bataataa rahaa huun main andhi havaa ko duun koi ilzaam kis liye apne diye ko aap bujhaataa rahaa huun main ik umr ke riyaaz kaa haasil na puchhiye reg-e-ravaan pe naqsh banaataa rahaa huun main har chand maslahat kaa taqaazaa kuchh aur thaa aaina har kisi ko dikhaataa rahaa huun main bachchon ke hanste-khelte chehron ki oT mein apne dukhon ki Tiis chhupaataa rahaa huun main ye aur baat khud mire paanv na uTh sake auron ko raasta to dikhaataa rahaa huun main 'saifi' fishaar-e-gham ki tamaazat ke baavajud hairat hai apni baat nibhaataa rahun main"

"is bahr-e-be-sadaa mein kuchh aur niche jaaein aavaaz kaa khazina shaayad tahon mein paaein galiyon mein saD rahi hain biite dinon ki laashein kamre mein gunjti hain be-naam si sadaaein maazi ki ye imaarat mehmaan hai koi dam ki divaar-o-dar shikasta aur tez-tar havaaein lete hi haath mein kyuun akhbaar phaaD Daalaa kaisi khabar chhapi thi ham kis ko kyaa bataaein shab ki siyah nadi se 'saifi' ubhar ke socho suraj ki raushni mein saae kahaan chhupaaein"

"habs ke dinon mein bhi ghar se kab nikalte hain daaere ke andar hi raaste badalte hain khuun jaltaa rahtaa hai gaanv ke javaanon kaa kaar-khaane shahron ke kab dhuaan ugalte hain tere naam kaa taaraa jaane kab dikhaai de ik jhalak ki khaatir ham raat bhar Tahalte hain ab safar koi bhi ho main kahaan akelaa huun tere chaand suraj bhi saath saath chalte hain ain dopahar mein bhi sar pe teraa saayaa hai tujh ko bhuul jaaein to chaandni mein jalte hain khul gae hain phir shaayad rahmaton ke darvaaze haadse kahaan varna Taalne se Talte hain niind ke nagar se to raabta nahin TuuTaa fikr-e-sher mein 'saifi' karvaTein badalte hain"

"aisaa lagtaa hai mukhaalif hai khudaai meri koi kartaa hi nahin khul ke buraai meri mujh mein madfun baDe shahr-e-maaani the magar duur tak kar na sakaa vaqt khudaai meri be-sadaa shahr thaa khaamosh the galiyon ke makin ek muddat mujhe aavaaz na aai meri khair-khvaahi kaa rahaa yuun to sabhi ko daavaa chaahtaa bhi to koi dil se bhalaai meri shab ki dahliz pe qazzaaq zarurat to nahin chhin letaa hai jo din-bhar ki kamaai meri kuchh mire ilm ne bhi mujh ko fazilat bakhshi fan se nisbat ne bhi tauqir baDhaai meri mujh ko mujh tak hi na mahdud samajhnaa 'saifi' laa-makaan se bhi pare tak hai rasaai meri"

"ik husn-e-be-misaal ke jo ru-ba-ru huun main mahsus ho rahaa hai khud apnaa 'adu huun main apni giraft-e-shauq se niklun to kis tarah phailaa huaa jahaan mein har ek su huun main mujh pe tiri hayaat kaa daar-o-madaar hai jazbon se jhaanktaa huaa zinda lahu huun main gunjungaa tere zehn ke gumbad mein raat-din jis ko na to bhulaa sake vo guftugu huun main har subh ek maa'rka-e-karbalaa sahi har shaam apne doston mein surkh-ru huun main puchhun main kis se 'aalam-e-imkaan mein kis liye apne hi naqsh-e-paa ki tarah ku-ba-ku huun main 'saifi' mein apne aap mein nilaam ho gayaa kis ko khabar thi shahr mein ik khub-ru huun main"

"bhulaa-bisraa khvaab hue ham kuchh aise naayaab hue ham dariyaa ban kar suukh gae the qatre se sairaab hue ham jaane kis manzar se guzre pal-bhar mein barfaab hue ham khud apni hi gahraai mein aakhir ko gharqaab hue ham khvaabon ki taabir bhi dekhein itne kab khush-khvaab hue ham baat zabaan par laa kar 'saifi' be-vaqat be-aab hue ham"