Ghazal

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"saanvli dhuup surmai mausam phir vahi ham hain phir vahi mausam khair ho saaebaan-e-gum-gashta jhelne paD gae kai mausam daastaan-e-tazaad hai goyaa shahr-e-khubaan samundari mausam ham ne apni bayaaz mein likkhe dil pe biite hue sabhi mausam ik ta'alluq hai 'aarzi yaa'ni mausam-e-gul hai 'aarzi mausam dil-figaaron ko kaun samjhaae lauTte kab hain makhmali mausam"

"chaahe khoTe hain yaa khare hain ham Dast-e-qudrat ke laaDle hain ham 'aks-e-rafta ko dekhiye saahib kitne maa'sum lag rahe hain ham raat jivan kaa giit gaati hai khvaab-e-tanvim dekhte hain ham 'umr lag jaaegi sanbhalne mein kis bulandi se yuun gire hain ham ek hangaam hai taghayyur kaa kunj-e-nisyaan mein paDe hain ham ab bhi mehndi kaa rang gahraa hai sandalin haath par rache hain ham ik tamaashaa hai kaar-zaar-e-hayaat dekh kar ser ho chuke hain ham jhilmilaate hain aarzu ke kanval dil-jharoke se jhaankte hain ham"

"shab ki taarik raahdaari hai aur miraa khauf iztiraari hai sabz khvaabon ki kam se kam qimat zindagi bhar ki ashk-baari hai ik musallat-shuda tamaddun ko ye na kahiye ki ikhtiyaari hai shash-jihaati mushaahida hai miyaan tajrabon ki sanad pe bhaari hai shukriya aap ki mohabbat kaa dil kaa maqsum sogvaari hai tajziye sun ke muskuraa denaa apni itni hi zimmedaari hai"

"jamaal-e-yaar aur us kaa bayaan mohabbat hai hasin shaam kaa dilkash samaan mohabbat hai hamein gila hai ki tum ne hamein nahin rokaa tumhein khabar thi ki aatish-fishaan mohabbat hai 'amal na ho to yaqin kis tarah dilaaoge zabaan se kitnaa bhi kah lo ki haan mohabbat hai vo aur log hain jo dushmani nibhaate hain mire liye to ye saaraa jahaan mohabbat hai hamaare gaanv ki barfili sard subhon mein sunaai deti hai jo vo azaan mohabbat hai vafaa ki aakhiri tamsil karbalaa hai dost sar-e-husain ba-nok-e-sinaan mohabbat hai"

"teri qudrat ke mo'tarif ke liye ism-e-aa'zam hai muktashif ke liye aaina-vaar jhilmilaae hain apne maa’kus-o-mun'atif ke liye koi jaa-e-sukun hai ki nahin rasm-e-kohna ke munharif ke liye mustaqil ik javaab laa-aa'raf vo bhi ik raaz-e-munkashif ke liye mann-o-salvaa utarne vaalaa thaa dasht-e-imkaan ke mo’takif ke liye"

"rang aansu hansi samajhte the tum miri an-kahi samajhte the sirf sohbat kaa faiz hai varna khaak ham zindagi samajhte the dil-mohalle ko chhoDne vaale saans ki symphony samajhte the khalvat-e-jaan mein bazm-aaraai dasht ko qais hi samajhte the naasehaa ek daur thaa ham bhi 'ishq ko dil-lagi samajhte the ab jo samjhe nahin gila kaisaa aap pahle kabhi samajhte the daaman-e-koh-e-gham ke baashinde daastaan-e-khafi samajhte the"

"khat mein likkhaa hai hamein ab lauT aanaa chaahiye kyaa kahein ki lauTne ko ik zamaana chaahiye aaina-saazi miyaan ajdaad ki miraas hai tum bataaoge mujhe kaise banaanaa chaahiye dahr ki hairat-saraa mein ab taghayyur hai bapaa ik pasandida sitaara jagmagaanaa chaahiye hamdam-e-kohna sahi gham-haa-e-qalb-e-sad-figaar khvaab-parvar saa'aton mein bhuul jaanaa chaahiye khvaab ki taa'bir chaahe dil-shikan hi kyon na ho aankh mein jalte diyon ko jhilmilaanaa chaahiye"

"koi pahlu bhi ab nayaa nahin hai baat karne ko kuchh bachaa nahin hai ham tujhe dekhne ko tarse hain aur tu jaan kar milaa nahin hai ek chiDiyaa ke aashiyaane ko shahr bhar mein kahin jagah nahin hai sainkaDon alvidaa'i sandese aur vo aaj tak gayaa nahin hai jab bhi chaahoge chhoD doge miyaan shaa'iri hai koi nasha nahin hai aaj bhi khair ki khabar na mili aur aage bhi aasraa nahin hai baap jaisaa shafiq aangan thaa ab miraa us se vaasta nahin hai dil-zadon ke liye shifaa ki du'aa mo'jiza ho koi davaa nahin hai"

"shikva-e-dil nahin kareinge ham zard mausam mein khil uTheinge ham apni vaaraftagi na jaaegi tum se ik roz aa mileinge ham guhar-aasaar aabginon ko gaahe hasrat se dekh leinge ham khvaab-dar-khvaab kuchh charaaghon mein raushni DhunDte raheinge ham oDh leni hai phir ridaa-e-sukut chikh chillaa ke thak chukeinge ham baat kyunkar samajh na aaegi is tayaqqun se gar kaheinge ham ik nazar aur dekh lo ham ko yuun dubaara nahin sajeinge ham"

"chal kahin duur zamaane se udhar milte hain jism ke aaina-khaane se udhar milte hain khuld-aasaar hai goyaa ye tiraa shahr-e-khayaal kaise rangin fasaane se udhar milte hain dil dafine ko kabhi khoj navaadir kitne vaqt ki gard haTaane se udhar milte hain yak-ba-yak dhundle hue jaate hain saare manzar aur phir tiir nishaane se udhar milte hain ik jazira hai ki khoe hue hairat-zadagaan sirf aavaaz lagaane se udhar milte hain"

"ik tabassum hama-ayyaam-e-giraan-baari bhi ne’mat-e-khuld hai fitrat mein subuksaari bhi ik zamaane baDaa khaamosh rahaa zehn-e-rasaa ab to baahar ko ubalti hai ye almaari bhi 'ain mumkin hai tanaffus ki suhulat na rahe kis ko raas aai hai marzi se giraftaari bhi jang kaa faisla 'ujlat mein nahin karnaa thaa tu qabila bhi ganvaa baiThaa hai sardaari bhi dost barson se yahi taur chalaa aataa hai miraa iqaan salaamat tiri 'ayyaari bhi ham dil-e-khaanamaan-barbaad liye phirte hain haae kyaa shai hai mohabbat ki ‘azaa-daari bhi"

"'ajab tarah ki masaafatein hain muqaddaron mein na qurbaton mein sukun paayaa na faaslon mein sunahri jhilon mein 'aks paDte the parbaton ke abhi farozaan hain saare manzar basaaraton mein use na fursat milegi daftar se doston se ham apne aansu chhupaae baiThe saheliyon mein ragon mein paiham ravaan hai ambar-fashaan mohabbat kisi ke baalon kaa lams zinda hai ungliyon mein do saa'aton mein simaT gai daastaan hamaari phisal gai hai jo ret baaqi thi muTThiyon mein na phuul jaise hasin farishton ke par taraasho na zahr gholo abhi se kachchi samaa'aton mein"

"dayaar-e-nur se taarikiyon mein aae hue kabhi na honge farozaan tire bujhaae hue sunahre log jo raste kushaada karte hain ye dil-zada hain bahut se fareb khaae hue kisi ne muD ke hamein muskuraa ke dekhaa thaa phir ek 'umr hui dil se muskuraae hue khasaara hai ki shab-o-roz baDhtaa jaataa hai hamaare khvaab bhi goyaa hain qaumiyaae hue"