Ghazal

"kyaa kahein mahfil se teri kyaa uThaa kar le gae ham mataa-e-dard ko tanhaa uThaa kar le gae dhuup kaa sahraa nazar aataa hai ab chaaron taraf aap to har peD kaa saayaa uThaa kar le gae ab vahi zarre hamaare haal par hain khanda-zan aasmaan tak jin ko ham unchaa uThaa kar le gae kyaa gharaz ham ko vahaan ab koi bhi aabaad ho ham to us basti se ghar apnaa uThaa kar le gae vo to majnun thaa rahaa jo umr bhar sahraa-navard ham jahaan pahunche vahin sahraa uThaa kar le gae kar na paae raahbar bhi rahnumaai jab 'hayaat' ham bhi hairaani mein naqsh-e-paa uThaa kar le gae"

"na raas aai chaman-zaar ki fazaa mujh ko mizaaj-e-barq ne be-ghar banaa diyaa mujh ko tamaam umr bhaTakte rahe jo raahon mein dikhaa rahe hain vahi aaj raastaa mujh ko hujum-e-dard mein dil ne to sab kaa saath diyaa milaa na apne hi ashkon kaa ham-navaa mujh ko vo paas the to har ik shai mein dil dhaDaktaa thaa vo duur hain to khaTakti hai har fazaa mujh ko ye kaarvaan na miri gumrahi pe yuun hanstaa rah-e-talab mein jo milte vo naqsh-e-paa mujh ko qadam qadam pe sanvaaraa jinhein mohabbat mein samajh rahe hain vahi ab shikasta-paa mujh ko koi rafiq na rahbar na koi raahguzar uDaa ke laai hai kis shahr mein havaa mujh ko 'hayaat' dukhti hui rag ko kis ne chheD diyaa uThi vo Tiis ki yaad aa gayaa khudaa mujh ko"

"agarche kahne ko kal kaaenaat apni thi haqiqatan kahaan apni bhi zaat apni thi kahein to kis se kahein ham hayaat apni thi na koi din thaa hamaaraa na raat apni thi koi bhi aaj to apnaa nazar nahin aataa jo tum the apne to kul kaaenaat apni thi ye kyaa ki aaj koi naam tak nahin letaa vo din bhi the ki har ik lab pe baat apni thi hamaare paas rahaa kyaa hai ab ghamon ke sivaa vo din gae ki rah-e-shash-jihaat apni thi hamin se bhuul kahin ho gai mohabbat mein vagarna vo nigah-e-iltifaat apni thi jo tum qarib the har shai pe ikhtiyaar saa thaa ye chaand aur sitaaron ki raat apni thi hamein khud apni khirad kaa ghurur le Duubaa nahin to ek zamaane mein baat apni thi 'hayaat' is liye nazm-e-kuhan ko toD diyaa ki aaj sirf isi mein najaat apni thi"

"dilon se uThne lagegaa dhuaan to kyaa hogaa badal gayaa kabhi rang-e-jahaan to kyaa hogaa machal gayaa jo dil-e-naa-tavaan to kyaa hogaa uThaa na ishq kaa baar-e-giraan to kyaa hogaa hamein fareb-e-mohabbat qubul hai lekin jo khul gai kabhi dil ki zabaan to kyaa hogaa ham ahl-e-dil hain kisi imtihaan se kyaa Darte liyaa falak ne tiraa imtihaan to kyaa hogaa hazaar dard sameTe hue huun ik dil mein bikhar gai jo miri daastaan to kyaa hogaa 'hayaat' kis ko dikhaaungi aabgina-e-dil milaa na koi yahaan qadr-daan to kyaa hogaa"

"koi to dil ki nigaahon se dekhtaa jaae hamaari ruuh ke kuchh gham sameTtaa jaae tumhaare milne ki har aas aaj TuuT gai tumhin bataao ki ab kis tarah jiyaa jaae zaraa to sochiye us dil kaa haal kyaa hogaa talaash-e-gul mein jo patthar ki choT khaa jaae sajaa ke tum ko gulon se uThaae hain patthar zamaana kitnaa sitamgar hai kyaa kiyaa jaae kareinge kaise haqiqat kaa saamnaa ham log hamein to khvaab hi koi dikhaa diyaa jaae kisi tarah to andhere ghamon ke chhaT jaaein miraa bujhaa huaa dil hi koi jalaa jaae rah-e-hayaat mein kaanTe bichhein ki phuul khilein ye shart hai tiri jaanib vo raasta jaae"

"kyaa kahein mahfil se teri kyaa uThaa kar le gae ham mataa-e-dard ko tanhaa uThaa kar le gae dhuup kaa sahraa nazar aataa hai ab chaaron taraf aap to har peD kaa saayaa uThaa kar le gae is bhari duniyaa mein ab to koi bhi apnaa nahin jaise tum har dard kaa rishta uThaa kar le gae qatre qatre ko taraste hain vo ab ahl-e-havas jo kabhi dharti se har dariyaa uThaa kar le gae ab vahi zarre hamaare haal par hain khanda-zan aasmaan tak jin ko ham unchaa uThaa kar le gae kyaa gharaz ham ko vahaan ab koi bhi aabaad ho ham to us basti se ghar apnaa uThaa kar le gae vo to majnun thaa rahaa jo umar bhar sahraa-navard ham jahaan pahunche vahin sahraa uThaa kar le gae kar na paae raahbar bhi rahnumaai jab 'hayaat' ham bhi hairaani mein naqsh-e-paa uThaa kar le gae"

"aaj hai dahr mein kyaa ik nai aafat ke sivaa bughz-o-nafrat ke sivaa ranj-o-musibat ke sivaa is tarah chhaayaa huaa hai nigah-o-dil pe tilism jaise har chiiz haqiqat ho haqiqat ke sivaa apne har jabr ko vo mehr-o-vafaa kahte hain ham bhi kuchh naam na dein us ko mohabbat ke sivaa hasti-e-ishq ko ab tak na koi jaan sakaa varna hai dahr mein kyaa aur mohabbat ke sivaa har-nafas ik nae tufaan ki yurish hai 'hayaat' kis ko ilzaam dein is daur mein qismat ke sivaa"

"fasl-e-gul kuchh bhi nahin baad-e-sabaa kuchh bhi nahin teri mahfil ho to jannat ki fazaa kuchh bhi nahin jaan-o-dil kar diye ham ne tiri raahon mein nisaar aur hamaare liye tohmat ke sivaa kuchh bhi nahin pakDe jaaeinge hamin hashr mein be-jurm-o-qusur aur gunahgaar ko duniyaa mein sazaa kuchh bhi nahin un ke dil par miraa ehsaas-e-sitam bhi hai garaan ghair ki sho'la-bayaani kaa gilaa kuchh bhi nahin jaam-e-jam ho kahin gardish mein magar phir bhi 'hayaat' chashm-e-saaqi se na chhilke to mazaa kuchh bhi nahin"

"ghar se jo shakhs bhi nikle vo sambhal kar nikle jaane kis moD pe kis haath mein khanjar nikle moajaza ban gai kyaa aaj miri tishna-labi ek qatre ke tale kitne samundar nikle gir gayaa ho jo fasilon ko uThaa kar khud hi kaise ab apne hisaaron se vo baahar nikle rahbaro tum ne to manzil kaa pataa bhi na diyaa tum se behtar to miri raah ke patthar nikle umr bhar zehn mein chubhtaa rahaa ik nashtar-e-gham jitne ehsaas the sab meraa muqaddar nikle tum se chhoDi na gai raah-e-vafaa phir bhi 'hayaat' kitne be-dard mile kitne sitamgar nikle"

"dil o nigaah mein ik raushni si lagti hai tumhaari yaad se vaabastagi si lagti hai ye kyaa sitam hai mahakti hui bahaaron mein har ek chehre pe pazhmurdagi si lagti hai ye kis ke haath mein aayaa hai daur-e-paimaana labon pe apne baDi tishnagi si lagti hai ham apne ghar mein bhi hain ab musaafiron ki tarah har ek chiiz yahaan ajnabi si lagti hai har ek saans pe pahra hai naa-khudaaon kaa ye zindagi bhi koi zindagi si lagti hai hazaar shauq numaayaan the jis nazar se kabhi vahi nigaah baDi ajnabi si lagti hai 'hayaat' kaun si ab raah ikhtiyaar karein har ek raah baDi ajnabi si lagti hai"

"ye jo rangin tabassum ki adaa hai mujh mein mujh ko lagtaa hai koi mere sivaa hai mujh mein khud bhi hairaan huun azal se ki ye kyaa hai mujh mein kaun shah-rag se miri bol rahaa hai mujh mein umar bhar jis ko tire gham ki amaanat samjhaa ab vahi taar-e-nafas TuuT gayaa hai mujh mein ek khushbu si ubharti hai nafas se mere ho na ho aaj koi aan basaa hai mujh mein mere qadmon pe zamaane ki jabin jhuk jaae devtaaon ki tarah ek anaa hai mujh mein tum to kun kah ke nigaahon se chhupe ho lekin har ghaDi ek nayaa hashr bapaa hai mujh mein kaun thaa jo mire ehsaas ko raushan kartaa umr bhar sirf miraa dil hi jalaa hai mujh mein dil kabhi zulmat-e-fardaa se hiraasaan na huaa ek khurshid nayaa roz ugaa hai mujh mein talkh-kaami se to kuchh aur nikharti hai 'hayaat' kis liye zahr koi ghol rahaa hai mujh mein"

"khushbu si koi aae to lagtaa hai ki tum ho shisha kahin Takraae to lagtaa hai ki tum ho ehsaas-e-mohabbat se kisi gosha-e-dil mein jab choT ubhar aae to lagtaa hai ki tum ho pur-kaif havaa mein jo kisi peD ke niche aanchal miraa lahraae to lagtaa hai ki tum ho chhune se kabhi baad-e-sabaa ke mire tan mein ik barq si lahraae to lagtaa hai ki tum ho sar rakh ke jo patthar pe kabhi raah-e-alam mein kuchh niind si aa jaae to lagtaa hai ki tum ho jab shaam-e-mulaaqaat paDosi ke makaan se aavaaz koi aae to lagtaa hai ki tum ho jab shaana bhi karne na uThe haath hamaaraa aur zulf sanvar jaae to lagtaa hai ki tum ho"

"vo ham se laakh mohabbat mein bad-gumaan se rahe ham un ke saath magar phir bhi naqd-e-jaan se rahe lagi hain sho'la-bayaani ki tohmatein aksar ham un ke shahr mein har-chand be-zabaan se rahe tamaazat-e-gham-e-dauraan hamein jalaa na saki tire khayaal ke har samt saaebaan se rahe usi zamin ke zarron mein kho gae ab ham ki jis zamin pe kabhi ban ke aasmaan se rahe 'hayaat' kis ko thaa ilhaam jaur-e-pinhaan kaa ki apne dil pe bazaahir vo mehrbaan se rahe"

"ham zulm-o-sitam chaahein ham jaur-o-jafaa maangein ab is ke sivaa tujh se maangein bhi to kyaa maangein tu khuub jafaaein kar tu khuub sazaaein de ham apni vafaaon kaa itnaa hi sila maangein dil kaanp uThaa apnaa surkhi se bahaaron ki ham barg-e-hinaa se ab kyaa rang-e-hinaa maangein is be-khudi-e-dil kaa puchhe na koi 'aalam ham us ke hi kuche mein aur us kaa pataa maangein koi kisi insaan pe phir jabr na kar paae duniyaa mein 'hayaat' aisi ham aab-o-havaa maangein"

"naadaan hain vahin jin ko 'adaavat si lage hai ham ko tiri har baat 'inaayat si lage hai shikva saa lage hai na shikaayat si lage hai us lab pe har ik baat mohabbat si lage hai kis kis ko tiri aaD mein sab luuT rahe hain ye to hamein be-naam siyaasat si lage hai behtar hai tire saamne ham lab hi na kholein har baat tujhe aaj shikaayat si lage hai kahte hain tumhein ab nahin ehsaas kisi kaa ye baat hamein ik nai tohmat si lage hai ik moD pe tu ne jo miraa saath diyaa thaa har moD pe ab teri rifaaqat si lage hai tapte hue sahraa mein kahaan chain jigar ko haan saaya-e-daaman mein to raahat si lage hai shaayad miraa ehsaas hi sab kuchh hai ki duniyaa sahraa si lage hai kabhi jannat si lage hai phulon ki mahak hai na shagufon ki lataafat phaili hui har-su tiri nikhat si lage hai kyaa kahiye 'hayaat' aaj hai vo daur-e-junun-khez chehre pe har ik fard ke vahshat si lage hai"

"khaali sharaab-e-ishq se saaghar kabhi na the aise to khushk dil ke samundar kabhi na the jo sang-e-ehtisaab yagaanon ke paas hain dushman ke haath mein bhi vo patthar kabhi na the kis samt jaa rahe hain unhein khud pataa nahin yuun be-khabar to raah se rahbar kabhi na the dil TukDe TukDe ho gayaa zakhmi hai ruuh bhi itne to tez vaqt ke nashtar kabhi na the miltaa nahin kahin bhi dar-o-baam kaa nishaan ham ghar mein rah ke itne to be-ghar kabhi na the kyaa jaanein kyaa huiin vo hasin shokhiyaan 'hayaat' aise niDhaal phuul se paikar kabhi na the"

"teri yaadon ne kabhi chain se jiine na diyaa main ne chaahaa to mujhe zahr bhi piine na diyaa yuun hi ban ban ke bigaDte rahe aain-e-vafaa be-sahaaron ko sahaaraa to kisi ne na diyaa gham to gham josh-e-masarrat ne baDhaayaa vo junun chaak-e-daamaan kisi unvaan bhi siine na diyaa zindagi gham se sanvarti hai ye maanaa lekin manzil-e-gham mein sahaaraa to kisi ne na diyaa aaj kyuun aa gae tum dard kaa darmaan ban kar jaam-e-furqat bhi mujhe chain se piine na diyaa tere milne ki khushi tere bichhaDne kaa malaal ghamza-e-shaam-o-sahar ne hamein jiine na diyaa kis se shikva karein viraani-e-hasti kaa 'hayaat' ham ne khud apni tamannaaon ko jiine na diyaa"