Ghazal

"jab naqaab-e-rukh-e-zebaa vo uThaa dete hain dil-e-har-zarra ko aaina banaa dete hain ruuh ko soz diyaa daagh jigar ko bakhshaa hazrat-e-ishq ajab daad-e-sakhaa dete hain subh-dam sehn-e-gulistaan mein sabaa ke jhonke aatish-e-dard-e-mohabbat ko havaa dete hain ab bhi ik ghairat-e-naahid ke naghme aksar umr-e-rafta ko miri mujh se milaa dete hain 'nayyar'-e-zaar ki qismat bhi jagaate jaate aap soe hue fitne to jagaa dete hain"

"soe raat ko rote-rote uTh baiThe phir sote-sote kaash vo zeb-e-baalin hote ham chaunk uThte sote-sote khatm huaa afsaana-e-hasti hanste-hanste rote-rote biit chali barsaat bhi aakhir kaaT diin raatein rote-rote teri yaad mein o pardesi umr ganvaa di rote-rote suukh gaiin aashaaon ki kaliyaan faiz-e-bahaaraan hote-hote shor hai har su 'nayyar' 'nayyar' ho gae charche hote-hote"

"dil-o-nazar ke liye lutf-e-naa-gahaan ban kar javaani aai thi ik khvaab-e-raaegaan ban kar vo shaakh-e-gul hamein aksar qafas mein yaad aai jo nazr-e-barq hui saqf-e-aashiyaan ban kar vo giit mutrib-e-aatish-navaa sunaa mujh ko jo aa sake lab-e-ushshaaq par fughaan ban kar jo aaj tak kisi uslub se bayaan na huaa vo raaz aaj khulaa un ki daastaan ban kar na rahnumaa hai na manzil na raah ai 'nayyar' ye log chal diye kis samt kaarvaan ban kar"

"ho chuki rusvaa-e-aalam chaak-daamaani miri ab chaman mein rang laaegi ghazal-khvaani miri ishq ke anvaar se ho jaaeinge dil taabnaak anjuman-afroz hogi sham-e-irfaani miri chaak honge mere soz-o-saaz se ghunchon ke dil gul khilaaegi chaman mein naala-saamaani miri bulbulon ko yaad aa jaaegi rudaad-e-bahaar dil ko taDpaaegi ai 'nayyar' ghazal-khvaani miri"

"bahaar-e-subh ne gul ko rulaa ke chhoD diyaa sharaab-e-naab ko shabnam banaa ke chhoD diyaa koi bataae ki is naakhudaa ko kyaa kahiye safina jis ne bhanvar mein phansaa ke chhoD diyaa vo sakht-jaan huun ki jab kaamyaab ho na saki tiri jafaa ne mujhe aazmaa ke chhoD diyaa tiri nazar ki bahaar-aafriniyon ke nisaar ki zakhm-e-dil ko gul-e-tar banaa ke chhoD diyaa sitam hai teri jafaa-e-vafaa-numaa ki mujhe jafaa-o-jaur kaa khugar banaa ke chhoD diyaa vahi hai zamzama-pairaa dilon mein ai 'nayyar' jise nasib ne shaair banaa ke chhoD diyaa"

"hairaan hai aankh chashm-e-inaayat ko kyaa huaa duniyaa mein rasm-o-raah-e-mohabbat ko kyaa huaa maanaa ki shahr-e-husn mein jins-e-vafaa nahin lekin jahaan mein ishq ki daulat ko kyaa huaa aati hai yaad roz khud aati nahin magar yaarab hamaari shaam-e-masarrat ko kyaa huaa vaqt-e-vidaa' zard huaa rang-e-rukh agar rang-o-bahaar-e-aariz-e-fitrat ko kyaa huaa thi ham ko aql se to na pahle hi kuchh umiid 'nayyar' junun ke faiz-o-karaamaat ko kyaa huaa"

"main in hasin nazaaron ke paas aa na sakaa khizaan-nasib bahaaron ke paas aa na sakaa rahaa falak pe sitaaron mein jalva gar mahtaab vo apne sina-fagaaron ke paas aa na sakaa tamaam umr rahaa ham-kanaar maujon se safina apnaa kinaaron ke paas aa na sakaa gadaa-e-ishq ki daulat thi fiqah-o-istighnaa vo maal-o-zar ke sahaaron ke paas aa na sakaa jahaan mein aam gham-e-rozgaar thaa 'nayyar' magar vo ishq ke maaron ke paas aa na sakaa"