Ghazal

"koi moajiza huaa hai miri be-khudi se aage teraa gham nikal gayaa hai miri har khushi se aage miri pyaas kaa taraana yuun samajh na aa sakegaa mujhe aaj sun ke dekho miri khaamoshi se aage main huun saans saans tanhaa main huun zarra zarra ghaayal mujhe paas aa ke dekho miri dilkashi se aage vahin kal bhi phir mileinge jahaan aaj mil rahe hain teri raushni ke pichhe miri tirgi se aage isi Dar se paDh na paai main tiraa payaam jaanaan kahin dil ko chhu na jaae miri bebasi se aage"

"jaane ab kho gayaa kidhar paani thaa kabhi aankh kaa guhar paani maaro patthar bhi to nahin hiltaa jam chukaa hai ab is qadar paani aane vaale hain kuchh hasin manzar tu abhi aankh mein na bhar paani tab ghazal ki gali pahunchtaa hai aankh se bah ke raat bhar paani na sameTaa gayaa na kaam aayaa main bhi huun jaise ret par paani meri hasti 'sahar' hai bas itni jaise sahraa mein buund bhar paani"

"nain to baar baar bhar jaaein kaise naghme bahaar ke gaaein teraa ehsaas kho gayaa ham se ab tujhe DhunDne kahaan jaaein haath apne lahuluhaan hue ranjishein aur kitni sahlaaein reshmi taar se bandhi thiin magar TuTti hi nahin hain aashaaein aap ke khuun kaa rang dekh liyaa ab adaa-kaariyaan na dikhlaaein ham mohabbat ke ho liye saahab aap apni dukaan par jaaein"

"kyaa karishma thaa khudaayaa der tak khud ko kho kar khud ko paayaa der tak chhu ke lauTaa jab tujhe meraa khayaal hosh mein vaapas na aayaa der tak kal koi jhonkaa havaa kaa chhu gayaa aur phir tu yaad aayaa der tak ham tiri aaghosh mein the raat bhar ''maah-e-kaamil muskuraayaa der tak'' kal tire ehsaas ki baarish tale meraa sunaa-pan nahaayaa der tak sun ke bhigi raat ki sargoshiyaan ik kunvaaraa-pan lajaayaa der tak"

"kaise hoti hai shab ki sahar dekhte kaash ham bhi kabhi jaag kar dekhte khvaab kaise utartaa hai ehsaas mein tere shaane pe rakh ke ye sar dekhte ek ummid thi muntazir umr bhar kaash tum bhi kabhi lauT kar dekhte barf ki jhini chaadar tale jhiil thi chhu ke mujh ko kabhi tum agar dekhte ungliyaan un ki letin na sannyaas to meri zulfon se bhi khel kar dekhte ek parvaaz mein gir na jaate agar tere man kaa gagan mere par dekhte band kamron ne kholi nahin saanklein varna sajde mein baiThi 'sahar' dekhte"

"ghar se nikle the aarzu kar ke aaj dil laaein ge rafu kar ke saare khaane mahak uThe dil ke tujh ko paane ki justuju kar ke tujh ko maangaa tamaam shab ham ne ishq se jaan-o-tan vuzu kar ke aaj ik baar khud ko phir dekho meraa ehsaas chaar su kar ke zakhm dikhte nahin magar us ne rakh diyaa dil lahu lahu kar ke"

"mukhtalif hain miri bahaar ke rang kuchh mire apne kuchh udhaar ke rang aaj yaksar bahaar le aai mere dil ki gali mein pyaar ke rang teri aankhon se milte-julte hain meri aankhon ke aabshaar ke rang dil ki chaukhaT sajaae baiThe hain aaj bhi tere intizaar ke rang raat mil kar gale bahut roe teri yaadon se mere pyaar ke rang vaqt ki dhuup kaa qusur nahin the hi kachche vo e'tibaar ke rang thak gae par mahak na laa paae kaaghzi phuul par bahaar ke rang dhuup rukh par paDi havas ki 'sahar' uD gae ishq ke khumaar ke rang"

"sapan kitnaa salonaa chaahti thi tiri mahbub honaa chaahti thi ye mohlat hi nahin di zindagi ne main tere saath ronaa chaahti thi tiri saanson ki khushbu se bhare hon main aise phuul bonaa chaahti thi tiri aaghosh mein aa kar ye jaanaa ki main sadiyon se sonaa chaahti thi ye mere aansuon ki intishaari tire gham kaa bichhaunaa chaahti thi mayassar hi na ho paayaa mujhe tu mein khud ko tujh mein khonaa chaahti thi"

"usi ki raushni rahti hai is qadar mujh mein jo us ke lauT ke aane ki hai khabar mujh mein chhuaa thaa jin mein kabhi mujh ko teri chaahat ne vo lamhe jaagte rahte hain raat bhar mujh mein jo raaste ke andheron se Dar ke lauT gayaa vo kaash dekhtaa zinda thi ik sahar mujh mein mujhe Daraa nahin sakti ye mushkilon ki dhuup abhi umiid kaa baaqi hai ik shajar mujh mein tire vujud ko chhu le to phir mukammal ho bhaTak rahi hai khushi kab se dar-ba-dar mujh mein"