Ghazal

"ik ik ko itaab baanTte ho kis tarah ke khvaab baanTte ho har chehre pe jhurriyaan likhi hain tum kaisaa shabaab baanTte ho firdaus tumhaare haath mein hai bandon ko azaab baanTte ho ik ek kali kaa rang faq hai ye kaise gulaab baanTte ho aankhon mein to ratjage likhe hain tum samjhe ki khvaab baanTte ho"

"kyaa ghazab tu ne ai bahaar kiyaa patti patti ko be-qaraar kiyaa ab to sach bolne ki rasm nahin kis ne phir ehtimaam-e-daar kiyaa aatish-e-dard mein kami na hui laakh aankhon ko ashk-baar kiyaa raushni ki talaash mein ham ne baarhaa zulmaton se pyaar kiyaa mauj-dar-mauj the dukhon ke bhanvar ham ne tanhaa sabhi ko paar kiyaa jab banaayaa thaa chaand itnaa hasin us kaa anjaam kyuun ghubaar kiyaa"

"jab baanTanaa hi azaab Thahraa phir kaisaa hisaab maangte ho sab honTon pe mohr lag chuki hai ab kis se javaab maangte ho kaliyon ko masal ke apne haathon phulon se shabaab maangte ho har lafz salib par chaDhaa kar tum kaisi kitaab maangte ho sab raushniyon ko chhin kar bhi divaanon se khvaab maangte ho firdaus-e-barin mein mil sakegi is yug mein sharaab maangte ho"

"shoala-e-dil bujhaa ke dekh liyaa aarzu ko miTaa ke dekh liyaa apne haathon jise sanvaaraa thaa vo chaman bhi luTaa ke dekh liyaa dil kaa jo zakhm thaa charaagh banaa aansuon ko chhupaa ke dekh liyaa chaaragar tere imtihaan ke liye zakhm par zakhm khaa ke dekh liyaa muskuraae to saath thi duniyaa ashk tanhaa bahaa ke dekh liyaa"

"zahr shirin hai sach piye jaao hamdamo mar ke bhi jiye jaao imtihaan-e-vafaa hamein manzur intihaa-e-sitam kiye jaao khul na jaae fareb-e-chara-gari zakhm har haal mein siye jaao raakh kaa Dher hain mah-o-anjum raakh mein justuju kiye jaao rah-ravi kaa yahi taqaazaa hai raahzan ko duaa diye jaao"

"sanvaare aakhirat yaa zindagi ko kahaan itni bhi mohlat aadmi ko bujhaai aansuon ne aatish-e-gham magar bhaDkaa diyaa hai bekali ko bharam khul jaaegaa daanaaiyon kaa pukaaro to zaraa divaangi ko jo sar jhuktaa nahin hai dil to jhuk jaae faqat itni talab hai bandagi ko jo dil se phuuT kar aankhon mein chamke taraste rah gae ham is hansi ko"

"naamus-e-vafaa kaa paas rahaa shikva bhi zabaan tak laa na sake andar se to roe TuuT ke ham par ek bhi ashk bahaa na sake saahil to nazar aayaa lekin tufaan mein balaa ki shiddat thi maujon ko manaayaa laakh magar ham jaanib saahil aa na sake ham kahte kahte haar gae aur duniyaa ne kuchh bhi na sunaa jab duniyaa ne israar kiyaa ham apnaa dard sunaa na sake kab ham ne gulistaan chaahaa thaa kab ham ne bahaarein maangin thiin ik gul ki tamannaa thi ham ko vo bhi to chaman mein paa na sake"

"tumhaaraa zauq-e-parastish mujhe aziiz magar main is zamin ki miTTi mujhe khudaa na kaho tumhaare saath agar do-qadam bhi chal na sakun to khasta-paa huun mujhe mujrim-e-vafaa na kaho ye ek pal ki dhaDakti hayaat bhi hai bahut tamaam-umr ke is rog ko buraa na kaho is ek khauf se lab si liye tumhaare huzur ki harf-e-shauq ko izhaar-e-muddaaa na kaho ye be-rukhi kaa gilaa mujh se pahle khud se karo use nigaah kaa yak-tarfa faisla na kaho guzarte vaqt ke marham se bhar na jaae kahin is ek zakhm ko chaahat ki intihaa na kaho main ek zinda haqiqat huun ek pal hi sahi tumhaaraa aks huun tum to mujhe fanaa na kaho"

"har samt sukut boltaa hai ye kaun se jurm ki sazaa hai hain paanv lahuluhaan lekin manzil kaa pata to mil gayaa hai ab laae ho muzhda-e-bahaaraan jab phuul kaa rang uD chukaa hai zakhmon ke diye ki lau main raqsaan arbaab-e-junun kaa rat-jagaa hai ab tere sivaa kise pukaarun tu mere vajud ki sadaa hai"

"tujh ko ab koi shikaayat to nahin ye magar tark-e-mohabbat to nahin meri aankhon mein utarne vaale Duub jaanaa tiri 'aadat to nahin tujh se begaane kaa gham hai varna mujh ko khud apni zarurat to nahin khul ke ro luun to zaraa ji sanbhle muskuraanaa hi masarrat to nahin tujh se farhaad kaa tesha na uThaa is junun par mujhe hairat to nahin phir se kah de ki tiri manzil-e-shauq meraa dil hai miri surat to nahin teri pahchaan ke laakhon andaaz sar jhukaanaa hi 'ibaadat to nahin"

"kaash tufaan mein safine ko utaaraa hotaa Duub jaataa bhi to maujon ne ubhaaraa hotaa ham to saahil kaa tasavvur bhi miTaa sakte the lab-e-saahil se jo halkaa saa ishaaraa hotaa tum hi vaaqif na the aadaab-e-jafaa se varna ham ne har zulm ko hans hans ke sahaaraa hotaa gham to khair apnaa muqaddar hai so is kaa kyaa zikr zahr bhi ham ko ba-sad-shauq gavaaraa hotaa baaghbaan teri inaayat kaa bharam kyuun khultaa ek bhi phuul jo gulshan mein hamaaraa hotaa tum par asraar-e-fanaa raaz-e-baqaa khul jaate tum ne ek baar to yazdaan ko pukaaraa hotaa"

"ahl-e-gham aao zaraa sair-e-gulistaan kar lein gar khizaan hai to chalo shaghl-e-bahaaraan kar lein phir to har samt andheraa hi andheraa hogaa pau phaTi hai to luTi bazm charaaghaan kar lein dil ki viraaniyaan aankhon mein uDaati hain ghubaar mil ke ro lein to kuchh un ko bhi farozaan kar lein qahqahon se to ghuTan aur bhi baDh jaaegi aao chup rah ke hi is dard kaa darmaan kar lein shaayad is tarah bagulon kaa guzar mumkin ho apne viraane ko kuchh aur bhi viraan kar lein ham jo zinda hain to sab kahte hain kyuun zinda hain aao mar kar bhi masihaaon ko hairaan kar lein"