Ghazal

"hujum-e-shahr se hai ab talaash-e-viraana khirad ki bhiiD se ghabraa gayaa hai divaana kushaada zarf hai kitni ye bazm-e-rindaana janaab-e-shaikh ko samjhaa nahin hai begaana kitaab-e-zist hai majmua ik fasaanon kaa usi mein hai kahin meraa bhi ek afsaana pilaa kuchh aur ai saaqi ki hosh hai ab tak kisi ki yaad mein haail hai shor-e-mai-khaana jise bhi dekhiye maatam-guzaar-e-qismat hai havas ne kar diyaa duniyaa ko ik azaa-khaana hamin se mai-kada 'saalik' hamin rahein pyaase chalo uTho ki badal dein nizaam-e-mai-khaana"

"mileinge raah mein sahraa bahut bahut gulshan ye dekhnaa hai kahaan rokti hai apni thakan chale chalo ki hai aaraasta rah-e-manzil kahin hai daar ba-qadr-e-junun kahin hai rasan rah-e-hayaat mein ik rang mein the kitne rang ulajh ke rah gayaa dil ki nigaah kaa daaman thi gul-misaal miri guftugu tire rukh se churaa liyaa tire honTon se main ne rang-e-sukhan kahaan kahaan na jali teri yaad ki qindil kahaan kahaan na hui dil ki justuju raushan"

"achchhi thi yaa buri thi bas ik haal par gai ye zindagi guzarne ki shai thi guzar gai rahzan hon jis ke rahnumaa us kaarvaan ki khair kis rah-guzar se puchhun ki manzil kidhar gai vo harf-e-haq vo justuju ye hasraton ke Dher laashein paDi hui hain jahaan tak nazar gai kis kho mein munh chhupaae hain jin ke baDe the bol vo inqilaab-khez hikaayat kidhar gai is daur mein jo dekhe hain manzar na puchhiye jhuTon ke haathon sachchon ki Topi utar gai sahmaa huaa zamir hai taale zabaan pe hain haq mar gayaa ye shahr mein kaise khabar gai"

"mire siine mein soz-e-aarzu kis ki inaayat hai subu meraa mai-e-naab-e-subu kis ki inaayat hai jahaan-e-khaak-zaa mein ek zarra hai vajud apnaa magar zarre mein zauq-e-justuju kis ki inaayat hai garebaan kahkashaan kaa thaam leti hai nazar apni junun-o-shauq shor-e-haa-o-hu kis ki inaayat hai ye maanaa baaghbaan main huun ye sehn-e-gulsitaan meraa magar phulon mein josh-e-rang-o-bu kis ki inaayat hai musavvir huun ye mere rang hain ye mu-qalam meraa magar tasvir mein rang-e-numu kis ki inaayat hai ye mizraab-o-surud-o-saaz-e-mahfil sab mire lekin mughanni kaa dil-e-aahang-ju kis ki inaayat hai ye mumkin hai nigaah-e-ishq se pinhaan rahe jalva magar ehsaas-e-zulf-e-mushk-bu kis ki inaayat hai ye meri bandish-e-alfaaz ye meri ghazal 'saalik' mire sheron mein pinhaan guftugu kis ki inaayat hai"

"dil-e-be-qaid ne baa-nur-e-imaan kaafiri ki hai haram mein sar jhukaayaa hai buton ki chaakari ki hai ba-sad bechaargi roz-e-azal se ibn-e-aadam ne khudaa ke har tasavvur par kisi ki but-gari ki hai khudaa shaahid inhin haathon ne toDe hain hazaaron but khudaa shaahid inhin haathon ne aksar aazari ki hai mataaa-e-bandagi bakhshish ki khaatir le kar aaya thaa sar-e-mahshar khudaa ke saath bhi saudaagari ki hai mashiyyat thi rahe majbur-e-mahkumi amal mere kabhi ki hai azaazili kabhi paighambari ki hai bas ik dar ke sivaa ye sar kahin jhukne nahin paayaa faqiri mein bhi is dil ne baDi iskandari ki hai kabhi taarikh-saazi ki kabhi afsaane bun Daale kabhi 'saalik' ne un ki yaad mein kuchh shaairi ki hai"

"har aaine se meraa dil puchhtaa hai ye 'saalik' vahi hai tu pahchaantaa hai vo sach laae jitne vo sab jhuTh nikle mujhe jhuTaa kahte hain vo intihaa hai khudaa aazmaae sanam aazmaae sanam jaante hain khudaa jaantaa hai bahut suuni suuni hain lailaa ki raahein ki majnun kaa dil be-sadaa ho gayaa hai ye maanaa ki sab hain ravaan su-e-manzil jise dekho vo qaafile se judaa hai main tauba-zada huun mujhe ye bataao mire baad maikhaane kaa haal kyaa hai"

"Dartaa rahtaa huun ham-nashinon mein ek patthar huun aabginon mein baat karnaa jinhein nahin aati aaj vo bhi hain nukta-chinon mein jo bhanvar ko samajhte hain saahil aise bhi log hain safinon mein mohtasib gin le ungliyon hi par chand hi rind hain kaminon mein khizr guzre the shahr se apne ham bhi the ek raah-binon mein baiat-e-haq ki baat kyaa karte haath larzaan the aastinon mein faiz-e-shahr-e-'anis' se 'saalik' sher kahte hain in zaminon mein"

"baDhte hain khud-ba-khud qadam azm-e-safar ko kyaa karun zer-e-qadam hai kahkashaan zauq-e-nazar ko kyaa karun tez hai kaarvaan-e-vaqt tishna hai justuju abhi rok luun zindagi kahaan shaam-o-sahar ko kyaa karun dair-o-haram ke rang bhi dekh chuki nigaah-e-zist dil mein to hai vahi chubhan aah-e-sahar ko kyaa karun aaj bhi hai vahi maqaam aaj bhi lab pe un kaa naam manzil be-shumaar gaam apne safar ko kyaa karun yaad kisi ki aa gai ho gai dhundli kaaenaat parde mein chhup gayaa koi dida-e-tar ko kyaa karun kitni umidon ke charaagh raah mein bujh ke rah gae apne to paanv thak gae shauq-e-safar ko kyaa karun ho gai zindagi ki shaam 'saalik'-e-raah thak gae manzilein duur ho gaiin raah-e-guzar ko kyaa karun"