us bevafaa se kar ke vafaa mar-miTaa 'razaa' — Aal

ham ne be-intihaa vafaa kar ke
be-vafaaon se intiqaam liyaa

bandishein ishq mein duniyaa se niraali dekhein
dil taDap jaae magar lab na hilaae koi

tum 'razaa' ban ke musalmaan jo kaafir hi rahe
tum se behtar hai vo kaafir jo musalmaan na huaa

un ke sitam bhi kah nahin sakte kisi se ham
ghuT ghuT ke mar rahe hain ajab bebasi se ham

jo chaahte ho so kahte ho chup rahne ki lazzat kyaa jaano
ye raaz-e-mohabbat hai pyaare tum raaz-e-mohabbat kyaa jaano

samajh to ye ki na samjhe khud apnaa rang-e-junun
mizaaj ye ki zamaana mizaaj-daan hotaa

fareb-e-saaqi-e-mahfil na puchhiye 'majruh'
sharaab ek hai badle hue hain paimaane

khudaa ke naam pe kyaa kyaa fareb dete hain
zamaana-saaz ye rahbar bhi main bhi duniyaa bhi

vaqt hotaa hai bevafaa yaaro
aadmi bevafaa nahin hotaa

bevafaai ki jab bhi baat chali
baa-khudaa tum bahut hi yaad aae

ye raqibon ki hai sukhan-saazi
be-vafaa aap hon khudaa na kare

ruuh ki gahraaiyon mein Duub kar dekhaa karo
ek dhokaa hai nazar kaa ye saraasar saamne