bevafaai ki jab bhi baat chali — Manzar Suhai

ishq pe ijtihaad kar kar ke
mujtahid ho gayaa huun main gham kaa

mohabbat ki bhi to ik bevafaa se
ye qatl-e-khud nahin to aur kyaa hai

hai isi baat kaa malaal mujhe
ki mujhe ab koi malaal nahin

hone do agar ho gae kuchh log bure bhi
gulshan mein agar phuul hain to khaar bhi honge

laDkaa na koi phir se ho barbaad dahr mein
tujh par na jaaein beTiyaan teri khudaa kare

raahon ke pattharon kaa bhalaa kyaa gila karun
ab aadmi ke dil bhi to patthar ke ho gae

mere khvaabon ke jharokon ko sajaate rahiye
na sahi vasl magar yaad to aate rahiye

ai chaman vaalo chaman mein yuun guzaaraa chaahiye
baaghbaan bhi khush rahe raazi rahe sayyaad bhi

koi puraanaa khat kuchh bhuli-bisri yaad
zakhmon par vo lamhe marham hote hain

tu jafaaon se jo badnaam kiye jaataa hai
yaad aaegi tujhe meri vafaa mere baad

aataa rahaa huun yaad main us ko tamaam umr
is zaaviye se ishq mein naakaam kab huaa

bulbul ko baaghbaan se na sayyaad se gila
qismat mein qaid likkhi thi fasl-e-bahaar mein