ye raqibon ki hai sukhan-saazi — Mardan Ali Khan Rana

rasm ulTi hai khub-ruyon ki
dost jis ke bano vo dushman hai

ki riyaa se na shaikh ne tauba
mar gayaa vo gunaahgaar afsos

tere aate hi dekh raahat-e-jaan
chain hai sabr hai qaraar hai aaj

jis ko dekho vo nuur kaa buqa
ye paristaan hai ki london hai

pyaar ki baatein kijiye saahab
lutf sohbat kaa guftugu se hai

diyaa vo jo na thaa vahm-o-gumaan mein
bhalaa main aur kyaa maangun khudaa se

kahte nahin hain haal kisi raazdaan se ham
vaaqif hue hain jab se fareb-e-jahaan se ham

kyaa kijiye kashish hai kuchh aisi gunaah mein
main varna yuun fareb mein aataa bahaar ke

khudaa kare kahin mai-khaane ki taraf na muDe
vo mohtasib ki savaari fareb-e-raah ruki

abhi se kaise kahun tum ko bevafaa saahab
abhi to apne safar ki hai ibtidaa saahab

main ne betaabaana baDh kar dasht mein aavaaz di
jab ghubaar uTThaa kisi divaane kaa dhokaa huaa

ham ne be-intihaa vafaa kar ke
be-vafaaon se intiqaam liyaa