sadaa kise dein 'naimi' kise dikhaaein zakhm — Abdul Hafiz Naeemi

tumhaare sang-e-taghaaful kaa kyuun karein shikva
is aaine kaa muqaddar hi TuTnaa hogaa

khaDaa huaa huun sar-e-raah muntazir kab se
ki koi guzre to gham kaa ye bojh uThvaa de

mire khulus pe shak ki to koi vajh nahin
mire libaas mein khanjar agar chhupaa niklaa

maazi ke reg-zaar pe rakhnaa sambhal ke paanv
bachchon kaa is mein koi gharaundaa banaa na ho

main bhi is safha-e-hasti pe ubhar saktaa huun
rang to tum miri tasvir mein bhar kar dekho

sajde ke har nishaan pe hai khuun saa jamaa huaa
yaaro ye us ke ghar kaa kahin raasta na ho

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ik safina hai tiri yaad agar
ik samundar hai miri tanhaai

udaasi muskuraati hai miyaan tab sher hote hain
nami aankhon mein aati hai miyaan tab sher hote hain

zard chehron se udaasi ke bichhaDne kaa sabab
log puchheinge to kah denaa ki dukh haar gayaa