yaad to haq ki tujhe yaad hai par yaad rahe — Abdul Rahman Ehsan Dehlvi

namaaz apni agarche kabhi qazaa na hui
adaa kisi ki jo dekhi to phir adaa na hui

gale se lagte hi jitne gile the bhuul gae
vagarna yaad thiin ham ko shikaayatein kyaa kyaa

dil-rubaa tujh saa jo dil lene mein ayyaari kare
phir koi dilli mein kyaa dil ki khabardaari kare

aag is dil-lagi ko lag jaae
dil-lagi aag phir lagaane lagi

ba-vaqt-e-bosa-e-lab kaash ye dil kaamraan hotaa
zabaan us bad-zabaan ki munh mein aur main zabaan hotaa

mai-kade mein ishq ke kuchh sarsari jaanaa nahin
kaasa-e-sar ko yahaan gardish hai paimaane ki tarah

jab ki pahlu se yaar uThtaa hai
dard be-ikhtiyaar uThtaa hai

taalib-e-dost alag rahte hain sab se un ko
paas-e-asnaam nahin khvaahish-e-islaam nahin

ilaahi tu bhi pyaaraa but bhi pyaaraa phir sunun kis ki
idhar kuchh shaikh kahtaa hai aur us jaanib barahman bhi

suntaa rahtaa huun to vo kuchh bhi kahe jaataa hai
us ko lagtaa hai ki me'yaar yahi hai apnaa

khud apne gham hi se ki pahle dosti ham ne
aur us ke baa'd gham-e-dostaan ko pahchaanaa

agar vo aaj raat hadd-e-iltifaat toD de
kabhi phir us se pyaar kaa khayaal bhi na aaegaa