dil ke aaine mein jab aap ki surat dekhi — Abu Mohammad Wasil Bahraichi

vafaadaari ghurur-e-be-rukhi ko khatm kar degi
ziyaada to nahin kuchh din rahein vo bad-gumaan shaayad

hansaa karte hain akasr log divaanon ki baaton par
jahaan vaale nahin samjhe mohabbat ki zabaan shaayad

agar teri tarah tabligh kartaa pir-e-mai-khaana
to duniyaa-bhar mein vaaiz mai-kashi hi mai-kashi hoti

mizaaj-e-husn to ik haal par rahaa qaaem
luTaane vaalon ne sab kuchh luTaa ke dekh liyaa

kaarvaan ishq ki manzil ke qarin aa pahunchaa
khud mire dil mein mire dil kaa makin aa pahunchaa

mujhe vo baaton baaton mein agar divaana kah dete
to divaanon mein meri mo'atabar divaangi hoti

ye kyaa zaruri ki sab baa-vafaa pukaarein hamein
koi to hai jo hamein bevafaa pukaartaa hai

vafaa kaa har chalan sikhlaa diyaa thaa
kisi ne bevafaa hone se pahle

aagahi se mili hai tanhaai
aa miri jaan mujh ko dhokaa de

kahte nahin hain haal kisi raazdaan se ham
vaaqif hue hain jab se fareb-e-jahaan se ham

kyaa kijiye kashish hai kuchh aisi gunaah mein
main varna yuun fareb mein aataa bahaar ke

ye shaairi kaa takalluf badan pe achchhaa libaas
sab iltizaam usi ek be-vafaa ke liye