ye shaairi kaa takalluf badan pe achchhaa libaas — Ahsan Gulfam

shahr kaa shahr ye pichhe jo paDaa hai mere
tere divaane mein kuchh baat to hoti hogi

mujh ko daavaa nahin yusuf saa hasin hone kaa
phir bhi hai meraa zulekhaaon mein charchaa saahab

rahne ko apne paas koi chhat nahin magar
chiDiyon ke chahchahaane ko aangan banaa diyaa

itni mahngaai hai marnaa bhi agar chaahun to
zahr miltaa nahin baazaar mein sastaa saahab

ab kahaan miltaa hai aashiq koi sachchaa saahab
zakhm hi koi lagaa dein mujhe achchhaa saahab

kahne ko faqat ibn-e-ali ibn-e-ali hain
dekho to kahin jazba-e-haidar nahin miltaa

har dil-fareb chiiz nazar kaa ghubaar hai
aankhein hasin hon to khizaan bhi bahaar hai

de kar fareb mujh ko gayaa thaa vo shokh-tan
khaa kar fareb lauTaa to siine se lag gayaa

ghair ne tum ko jaan kahaa samjhe bhi kuchh ki kyaa kahaa
yaani ki bevafaa kahaa jaan kaa e'tibaar kyaa

fareb-e-abr-e-karam bhi baDaa sahaaraa hai
balaa se nakhl-e-tamannaa khizaan-rasida nahin

kuchh din ke baa'd us se judaa ho gae 'munir'
us bevafaa se apni tabiat nahin mili

jaan kar us but kaa ghar kaaba ko sajda kar liyaa
ai barahman mujh ko baitullaah ne dhokaa diyaa