kitaab-e-umr se sab harf uD gae mere — Afzal Ahmad Syed

kamaan-e-khaana-e-aflaak ke muqaabil bhi
main us se aur vo phir kaj-kulaah mujh se huaa

kamaan-e-shaakh se gul kis hadaf ko jaate hain
nasheb-e-khaak mein jaa kar mujhe khayaal aayaa

is dil ko kisi dast-e-adaa-sanj mein rakhnaa
mumkin hai ye mizaan-e-kam-o-besh jalaa de

main dil ko us ki taghaaful-saraa se le aayaa
aur apne khaana-e-vahshat mein zer-e-daam rakhaa

use ajab thaa ghurur-e-shaguft-e-rukhsaari
bahaar-e-gul ko bahut be-hunar kahaa us ne

yahi bahut the mujhe naan o aab o shama o gul
safar-nazhaad thaa asbaab mukhtasar rakkhaa

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

mujh mein khud meri adam-maujudgi shaamil rahi
varna is maahaul mein jiinaa baDaa dushvaar thaa

allaah jab bhi detaa hai chhappar phaaD ke detaa hai
is ummid pe saari umr chhappar-tale guzaari hai

zindagi mein kasak zaruri thi
ye khalaa pur tiri kami se huaa