use ajab thaa ghurur-e-shaguft-e-rukhsaari — Afzal Ahmad Syed

kamaan-e-khaana-e-aflaak ke muqaabil bhi
main us se aur vo phir kaj-kulaah mujh se huaa

kamaan-e-shaakh se gul kis hadaf ko jaate hain
nasheb-e-khaak mein jaa kar mujhe khayaal aayaa

is dil ko kisi dast-e-adaa-sanj mein rakhnaa
mumkin hai ye mizaan-e-kam-o-besh jalaa de

main dil ko us ki taghaaful-saraa se le aayaa
aur apne khaana-e-vahshat mein zer-e-daam rakhaa

yahi bahut the mujhe naan o aab o shama o gul
safar-nazhaad thaa asbaab mukhtasar rakkhaa

kitaab-e-umr se sab harf uD gae mere
ki mujh asiir ko honaa hai ham-kalaam us kaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

kaun kah gayaa hai maut TuTne se aati hai
gul ne to bikhar ke baagh kar diyaa gulaabi saa

main aksar kho saa jaataa huun gali-kuchon ke jangal mein
magar phir bhi tire ghar ki nishaani yaad rakhtaa huun