muskaati aankhon mein aksar — Afzal Hazarvi

ik adnaa saa shaa'ir huun main laakhon mein
apni ik pahchaan banaataa rahtaa huun

andar se main TuTaa-phuTaa ek khanDar viraana thaa
zaahir jo taamir na hoti to main yaaro kyaa kartaa

panchhi saare peD se uD jaaeinge
sahn mein ik khaamushi rah jaaegi

safina ho rahaa hai gharq-e-tufaan
nigaahon se kinaare jaa rahe hain

khet jal-thal kar diye sailaab ne
mar gae armaan sab dahqaan ke

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

jab bhi TuuTaa mire khvaabon kaa hasin taaj-mahal
main ne ghabraa ke kahi 'mir' ke lahje mein ghazal

ik mohabbat bhare cinema mein
mere marne kaa scene mere khvaab

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

usi ke khvaab the saare usi ko saunp diye
so vo bhi jiit gayaa aur main bhi haaraa nahin