apnaa ghar shahr-e-khamoshaan saa hai — Afzal Parvez

tum un ko sazaa kyuun nahin dete ki jinhon ne
mujrim kaa zamir aur sukun luuT liyaa hai

main to apni jaan pe khel ke pyaar ki baazi jiit gayaa
qaatil haar gae jo ab tak khuun ke chhinTe dhote hain

alakh jamaae dhuni ramaae dhyaan lagaae rahte hain
pyaar hamaaraa maslak hai ham prem-guru ke chele hain

kaarzaar-e-ishq-o-sar-masti mein nusrat-yaab hon
vo jununi daar tak jaane ko jo betaab huun

har musaafir tire kuche ko chalaa
us taraf chhaanv ghani ho jaise

husn ki daulat us ki hai aur vasl ki ishrat bhi us ki
jis ne pal pal hijr mein kaaTaa jaur sahe dukh jhele hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

maarka garm to ho lene do khun-rezi kaa
pahle shamshir ke niche hamin jaa baiTheinge

gul kiyaa jis ne vo thaa aur magar
shama ne shikva havaaon se kiyaa

shaam mimbar par fazilat ke bahut sanjida farhaan
subh-dam afsurdagi ke farsh par bikhraa huaa main

taa-subh meri laash rahi be-kafan to kyaa
baanu-e-shaam nauha-kunaan hi nahin hui