raas aaegi mohabbat us ko — Ahmad Kamran

ik pal kaa tavaqquf bhi giraan-baar hai tujh par
aur ham ki thake-haare masaafat se gurezaan

chaahiye hai mujhe inkaar-e-mohabbat mire dost
lekin is mein tiraa inkaar nahin chaahiye hai

miri vafaa hai mire munh pe haath rakkhe hue
tu sochtaa hai ki kuchh bhi nahin samajhtaa main

chand peDon ko hi majnun ki duaa hoti hai
sab darakhton pe to patthar nahin aayaa kartaa

mujh pe tasvir lagaa di gai hai
kyaa main divaar dikhaai diyaa huun

tu ne ai ishq ye sochaa ki tiraa kyaa hogaa
tere sar se main agar haath uThaa letaa huun

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

khvaab dekhaa thaa mohabbat kaa mohabbat ki qasam
phir isi khvaab ki taabir mein masruf thaa main

'abas dil be-kasi pe apni tuun har vaqt rotaa hai
na kar gham ai divaane 'ishq mein aisaa hi hotaa hai

ishq ke shoale ko bhaDkaao ki kuchh raat kaTe
dil ke angaare ko dahkaao ki kuchh raat kaTe

vasl hai un ki adaa hijr hai un kaa andaaz
kaun saa rang bharun ishq ke afsaanon mein