javaab aae na aae shikan to aaegi — Ahmad Sageer

zard mausam ne darakhton ki zabaan sil di thi
phir koi phuul hansaa aur khizaan haar gai

khudaa-yaa apne kun ki laaj rakh le
tiraa shahkaar zaae' ho rahaa hai

dastaras mein na rahe lafz-gari behtar hai
ham agar bol paDeinge to bahut boleinge

ajnabiyyat ki jhalak dekhi gai lahje mein
baat Darne ki hai is baat pe Dar jaaiye naa

khurach khurach ke tujhe zehn se miTaaungaa
main apne hosh ke naakhun zaraa baDhaa to luun

zard chehron se udaasi ke bichhaDne kaa sabab
log puchheinge to kah denaa ki dukh haar gayaa

khauf-e-mahshar na rahaa dil mein jo dekhaa main ne
pusht par mere gunaahon ke hai rahmat us ki

shahr ki galiyon mein gahri tirgi giryaan rahi
raat baadal is tarah aae ki main to Dar gayaa

din bhar jo suraj ke Dar se galiyon mein chhup rahte hain
shaam aate hi aankhon mein vo rang puraane aa jaate hain

ham gardish-e-girdaab-e-alam se nahin Darte
tufaan hai agar aaj kinaara bhi to hogaa

dilli hui hai viraan suune khanDar paDe hain
viraan hain mohalle sunsaan ghar paDe hain

'zafar' aadmi us ko na jaaniyegaa vo ho kaisaa hi saahab-e-fahm-o-zakaa
jise aish mein yaad-e-khudaa na rahi jise taish mein khauf-e-khudaa na rahaa