ruThaa yaar manaanaa hai — Ajeet Singh Hasrat

abhi kuchh aur tiri justuju rulaaegi
abhi kuchh aur bhaTaknaa hai dar-ba-dar mujh ko

aakhiri ummid bhi aankhon se chhalkaae hue
kaun si jaanib chale hain tere Thukraae hue

hijr kaa din kyuun chaDhne paae
vasl ki shab tulaani kar do

ban sanvar kar rahaa karo 'hasrat'
us ki paD jaae ik nazar shaayad

bas ek hi balaa hai mohabbat kahein jise
vo paaniyon mein aag lagaati hai aaj bhi

pahle vaqton mein ho to ho shaayad
dosti ab hasin gaali hai

jab ki pahlu se yaar uThtaa hai
dard be-ikhtiyaar uThtaa hai

ghazal kahne mein yuun to koi dushvaari nahin hoti
magar ik masala ye hai ki meyaari nahin hoti

samajh liyaa thaa tujhe dost ham ne dhoke mein
so aaj se tujhe baar-e-digar samajhte hain

sab doston se mujh ko ziyaada 'aziz hai
aisaa bhi ek shakhs mire dushmanon mein hai

meri to jaan hi nikal gai jab
dost kah kar mujhe pukaaraa gayaa

vo raatein kaif mein Duubi vo teri pyaar ki baatein
nikal paDte hain aansu jab kabhi ham yaad karte hain