koi manzar nahin barsaat ke mausam mein bhi — Akhtar Shahjahanpuri

dilon mein karb baDhtaa jaa rahaa hai
magar chehre abhi shaadaab se hain

abhi tahzib kaa nauha na likhnaa
abhi kuchh log urdu bolte hain

ye moajiza hamaare hi tarz-e-bayaan kaa thaa
us ne vo sun liyaa thaa jo ham ne kahaa na thaa

apnon se jang hai to bhale haar jaaun main
lekin main apne saath sipaahi na laaungaa

vo jugnu ho sitaara ho ki aansu
andhere mein sabhi mahtaab se hain

ranj-o-gham sahne ki aadat ho gai hai
zinda rahne ke saliqe de gayaa vo

pyaaso raho na dasht mein baarish ke muntazir
maaro zamin pe paanv ki paani nikal paDe

aah zaalim ho chuki ik muntazir ki aankh band
ab tiraa aanaa na aanaa sab baraabar ho gayaa

kahaan jaati hain baarish ki duaaein
shajar par ek bhi patta nahin hai

kyuun shikan paD gai hai abru par
main to kahtaa huun ek baat ki baat

kachche makaan jitne the baarish mein bah gae
varna jo meraa dukh thaa vo dukh umr bhar kaa thaa

kyaa kahun dida-e-tar ye to miraa chehraa hai
sang kaT jaate hain baarish ki jahaan dhaar gire