ye moajiza hamaare hi tarz-e-bayaan kaa thaa — Akhtar Shahjahanpuri

dilon mein karb baDhtaa jaa rahaa hai
magar chehre abhi shaadaab se hain

abhi tahzib kaa nauha na likhnaa
abhi kuchh log urdu bolte hain

apnon se jang hai to bhale haar jaaun main
lekin main apne saath sipaahi na laaungaa

koi manzar nahin barsaat ke mausam mein bhi
us ki zulfon se phisalti hui dhupon jaisaa

vo jugnu ho sitaara ho ki aansu
andhere mein sabhi mahtaab se hain

ranj-o-gham sahne ki aadat ho gai hai
zinda rahne ke saliqe de gayaa vo

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne