chaDhe hue hain jo dariyaa utar bhi jaaeinge — Akram Mahmud

ab dil bhi dukhaao to aziyyat nahin hoti
hairat hai kisi baat pe hairat nahin hoti

sitaara aankh mein dil mein gulaab kyaa rakhnaa
ki Dhalti umr mein rang-e-shabaab kyaa rakhnaa

do chaar baras jitne bhi hain jabr hi sah lein
is umr mein ab ham se baghaavat nahin hoti

bas itnaa yaad hai ik bhuul si hui thi kahin
ab is se baDh ke dukhon kaa hisaab kyaa rakhnaa

gum to honaa thaa ba-har-haal kisi manzar mein
dil huaa khvaab mein gum aankh hui aab mein gum

paanv uThte hain kisi mauj ki jaanib lekin
rok letaa hai kinaara ki Thahar paani hai

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

taarikh bataaegi vo qatra hai ki dariyaa
aansu hai abhi vaqt ke qadmon mein paDaa hai

Dubo rahaa hai mujhe Dubne kaa khauf ab tak
bhanvar ke biich huun dariyaa ke paar hote hue

vo nahaa kar zulf-e-pechaan ko jo bikhraane lage
husn ke dariyaa mein pinhaan saanp lahraane lage

chashm-e-tar ne bahaa ke ju-e-sarishk
mauj-e-dariyaa ko dhaar par maaraa

ik khitta-e-khun mein kahin dariyaa ke kinaare
divaar-e-zamaana se giraa dhyaan phisal kar