kabhi kabhi kitnaa nuqsaan uThaanaa paDtaa hai — Alam Khursheed

kisi ke raste pe kaise nazrein jamaae rakkhun
abhi to karnaa mujhe hai khud intizaar meraa

tamaam rang adhure lage tire aage
so tujh ko lafz mein tasvir kartaa rahtaa huun

tahzib ki zanjir se uljhaa rahaa main bhi
tu bhi na baDhaa jism ke aadaab se aage

kisi ko DhunDte hain ham kisi ke paikar mein
kisi kaa chehra kisi se milaate rahte hain

ab kitni kaar-aamad jangal mein lag rahi hai
vo raushni jo ghar mein bekaar lag rahi thi

ishq mein tahzib ke hain aur hi kuchh falsafe
tujh se ho kar ham khafaa khud se khafaa rahne lage

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

khud apni tajalli khud apni nigaahein
mohabbat mein guzre hain ye bhi zamaane

nae kirdaar aate jaa rahe hain
magar naaTak puraanaa chal rahaa hai

maza chakhaa ke hi maanaa huun main bhi duniyaa ko
samajh rahi thi ki aise hi chhoD dungaa use

ek muddat mein baDhaayaa tu ne rabt
ab ghaTaanaa thoDaa thoDaa chaahiye