Shayari Of Rahat Indori

shāḳhoñ se TuuT jaa.eñ vo patte nahīñ haiñ ham
āñdhī se koī kah de ki auqāt meñ rahe

ham se pahle bhī musāfir ka.ī guzre hoñge
kam se kam raah ke patthar to haTāte jaate

na.e kirdār aate jā rahe haiñ
magar nāTak purānā chal rahā hai

bahut ġhurūr hai dariyā ko apne hone par
jo merī pyaas se uljhe to dhajjiyāñ uḌ jaa.eñ

dostī jab kisī se kī jaa.e
dushmanoñ kī bhī raa.e lī jaa.e

maiñ mar jā.ūñ to merī ek alag pahchān likh denā
lahū se merī peshānī pe hindustān likh denā

ghar ke bāhar DhūñDhtā rahtā huuñ duniyā
ghar ke andar duniyā-dārī rahtī hai

sūraj sitāre chāñd mire saath meñ rahe
jab tak tumhāre haath mire haath meñ rahe

mirī ḳhvāhish hai ki āñgan meñ na dīvār uThe
mire bhaa.ī mire hisse kī zamīñ tū rakh le

bīmār ko maraz kī davā denī chāhiye
maiñ piinā chāhtā huuñ pilā denī chāhiye

terī mahfil se jo niklā to ye manzar dekhā
mujhe logoñ ne bulāyā mujhe chhū kar dekhā

us kī yaad aa.ī hai sāñso zarā āhista chalo
dhaḌkanoñ se bhī ibādat meñ ḳhalal paḌtā hai