bahut se lafz dastak de rahe the — Ambarin Salahuddin

ulajhti jaati hain girhein adhure lafzon ki
ham apni baaton ke saare agar magar kholein

ik manzar mein ik dhundle se aks mein chhup ke ro lein
ham kis khvaab mein aankhein mundein kis mein aankhein kholein

aap kahein to tiin zamaane ek hi lahr mein bah niklein
aap kahein to saari baaton mein aisi aasaani hai

tum jo chaaho to ruk bhi saktaa hai
varna kis se rukaa hai aadhaa din

meri hairat miri vahshat kaa pata puchhti hai
dekhiye kaun kise pahle rasaai degaa

jaane kis khvaab ki hairat ne jagaae rakkhaa
phir miri hasrat-e-naakaam ne dekhaa us ko

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

jism bhukaa hai to hai ruuh bhi pyaasi meri
kaam aisaa hai ki din raat kaa kaarinda huun