kaun royaa pas-e-divaar-e-chaman aakhir-e-shab — Anwar Moazzam

vo habib ho ki rahbar vo raqib ho ki rahzan
jo dayaar-e-dil se guzre use ham-kalaam kar lo

hamein baada-kash-e-dard-e-tamannaa
hamin par band hai mai-khaana dil kaa

sab dikhaate hain tiraa aks miri aankhon mein
ham zamaane ko isi taur se mahbub hue

aankhon mein ghul na jaaein kahin zulmaton ke rang
jis samt raushni hai udhar dekhte raho

aao dekhein ahl-e-vafaa ki hoti hai tauqir kahaan
kis mahfil kaa naam hai maqtal khinchti hai shamshir kahaan

dilon ki aag baDhaao ki log kahte hain
charaagh-e-husn se raushan jahaan nahin hotaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

dil ne go laakh ye chaahaa ki bhulaa duun tujh ko
yaad ne teri magar aaj bhi maaraa shab-khun

khvaabon ki tarah aanaa khushbu ki tarah jaanaa
mumkin hi nahin lagtaa ai dost tujhe paanaa

kis se puchhein raat-bhar apne bhaTakne kaa sabab
sab yahaan milte hain jaise niind mein jaage hue