din ki aankhein band hui hain — Arifa Shahzad

tujhe aaghaaz hi se paDh liyaa thaa
tire chehre pe sab likhaa huaa thaa

nashtar jaisaa andar ik chubhtaa kaanTaa hai
jaane us ne dukh baanTaa yaa dil baanTaa hai

ab bhi mat puchh mire dil mein hai kyaa rahne de
baat vaise bhi nahin tujh ko bataane vaali

sab mumkin hai farz hi kar lo
khushbu apni ok mein bhar lo

khvaab mein jaagti be-khvaabi pataa puchhti hai
kyaa kahein niind bhi hoti hai sulaane vaali

shor din ko nahin sone detaa
shab ko sannaaTaa jagaa detaa hai

ji DhunDtaa hai phir vahi fursat ki raat din
baiThe rahein tasavvur-e-jaanaan kiye hue

dil mein na ho jurat to mohabbat nahin milti
khairaat mein itni baDi daulat nahin milti

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

ye sar-ba-mohr botalein hain jo sharaab ki
raatein hain un mein band hamaari shabaab ki

kahun ai zauq kyaa haal-e-shab-e-hijr
ki thi ik ik ghaDi sau sau mahine