jal rahaa hai jo lab-e-baam abhi ek charaagh — Asim Nadeem Asi

dost-daari ke saliqe se bahut vaaqif huun
ab mujhe haath milaane kaa hunar aataa hai

hamaaraa jism to phir jism Thahraa
daraaDein aib hain divaar mein bhi

tapte sahraa khuun piyeinge chaDhtaa suraj Dhal jaaegaa
baiThi hui hai jis mein sakina aaj vo khema jal jaaegaa

zamin ke maalik-o-mukhtaar ki sunnat samajh kar
khaDaavein pahn liin aur bakriyaan rakkhi hui hain

hamaari kaarobaari zindagi kaa kul asaasa
ye kuchh sikke hain aur kuchh parchiyaan rakkhi hui hain

husain aaj bhi qaaem hai apni surat par
yazid chehre badaltaa hai har zamaane mein

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

bas ek baar vo aayaa thaa sair karne ko
phir us ke saath hi khushbu gai chaman bhi gayaa