kisi aur ko main tire sivaa nahin chaahtaa — Ataul Hasan

sirf tasvir rah gai baaqi
jis mein ham ek saath baiThe hain

ab vo kahtaa hai ki zanjir bani mere liye
us ke pairon mein jo paael kabhi pahnaai thi

dhuup baDhi to vo bhi apne apne paanv khinch gae
main ne apne hisse ki jin peDon ko hariyaali di

sabhi se jab mohabbat chaahte ho
mohabbat kyon nahin karte sabhi se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

hamein anjaam bhi maalum hai lekin na jaane kyuun
charaaghon ko havaaon se bachaanaa chaahte hain ham

kisi ki mehrbaani se mohabbat mutmain kyaa ho
mohabbat to mohabbat se bhi aasuda nahin hoti

use kaho ki natija koi na niklegaa
use kaho ki mohabbat kaa imtihaan na le

gae mausam kaa ik piilaa saa pattaa shaakh par rah kar
na jaane kyaa bataanaa chaahtaa hai in bahaaron ko